Shënohet Dita e të Mbijetuarve të Dhunës Seksuale gjatë luftës në Kosovë

Propozuar një vit më parë nga Presidentja Vjosa Osmani, sot në Kosovë shënohet Dita e të Mbijetuarave të Dhunës Seksuale gjatë luftës së fundit në Kosovë. Kjo datë përkon me ditën e rrëmbimit të Vasfije Krasniqit nga forcat serbe.

Më 14 prill të vitit 1999, Vasfije Krasniqi u rrëmbye me forcë dhe u dhunua në mënyrë barbare nga forcat serbe.

Llogaritet që në Kosovë janë edhe 20 mijë të mbijetuar të dhunës seksuale.

Presidentja Vjosa Osmani, në oborrin e Kuvendit të Kosovës, së bashku me përfaqësueset e organizatave, të cilat përfaqësojnë interesin e të mbijetuarave të dhunës seksuale gjate luftës në Kosovë, hapi ekspozitën, e cila organizohet për të ilustruar shpresat dhe nevojat e të mbijetuarave të dhunës seksuale të luftës në Kosovë.

Ndryshe, 14 prilli, Dita e të Mbijetuarve të Dhunës Seksuale gjatë luftës së fundit në Kosovë, shënohet nën kujdesin e Presidentes së Republikës së Kosovës.