Shërbimi sekret i Rusisë: Serbia furnizon me municione Ukrainën pavarësisht “neutralitetit”
Kompanitë serbe të mbrojtjes, në kundërshtim me “neutralitetin” e shpallur nga Beogradi zyrtar, dërgojnë municione në Kiev, njoftoi sot Shërbimi i inteligjencës së jashtme të Rusisë.
Fshehja e veprimeve antiruse është një skemë e thjeshtë që përdor certifikata të rreme të përdoruesve fundorë dhe vendeve ndërmjetëse, shpjegoi Shërbimi sekret rus, raporton Sputnik International.
“Ndër këto të fundit, përmenden më shpesh vendet e NATO-s si Republika Çeke, Polonia dhe Bullgaria. Kohët e fundit, opsione ekzotike që përfshijnë vende afrikane janë përdorur gjithashtu për këtë qëllim,” thuhet në Raport.
Kompanitë më të mëdha serbe, përfshirë Jugoimport SDPR, Zenitprom, Krušik, Sofag, Reyer DTI, Prvi Partizan, marrin pjesë në dërgesat ushtarake në Kiev, njoftoi shërbimi i inteligjencës së jashtme.
“Kontributi i punëtorëve të mbrojtjes serbe në luftën e nisur nga Perëndimi, rezultatin e së cilës Evropa do të donte ta shihte si ‘disfatë strategjike’ të Rusisë, vlerësohet në qindra mijëra predha për MLRS, si dhe një milion copë municione për armë të vogla. Dërgesa të tilla vështirë se mund të justifikohen për arsye ‘humanitare’. Ato kanë një qëllim të qartë, të vrasin dhe plagosin personelin ushtarak rus dhe popullsinë civile të Rusisë,” thuhet në raport, raporton portali rus.
Ndryshe, RFE raportoi vitin e kaluar se rrugët me të cilat armët dhe municionet nga Serbia arrijnë përfundimisht në duart e ushtrisë ukrainase janë të panjohura edhe për Institutin Ndërkombëtar të Kërkimeve për Paqen, SIPRI, me seli në Stockholm.
“SIPRI kryen kërkime bazuar në burime të disponueshme publike, dhe mënyrat se si armët (veçanërisht municionet) nga Serbia mund të përfundojnë në Ukrainë janë jashtëzakonisht jo transparente,” tha për RFE studiuesja e SIPRI-t, Katarina Gjokiç.
Çështja u rihap pasi Nd/Sekretari i Shtetit i SHBA-së për Çështjet Evropiane dhe Euroaziatike, James O’Brien, deklaroi më 8 korrik se Serbia “duke i vënë armët e saj në dispozicion, po ndihmon Ukrainën të mbrojë një parim thelbësor të së drejtës ndërkombëtare”.
Më 22 qershor të vitit të kaluar, Financial Times publikoi vlerësime se Serbia në mënyrë indirekte, nëpërmjet vendeve të tjera, eksportoi në Ukrainë municione me vlerë 800 milionë euro që nga fillimi i pushtimit rus .
Presidenti i Serbisë më pas konfirmoi se informacioni në lidhje me vlerën e municioneve ishte kryesisht i saktë, duke e paraqitur shitjen si një mundësi biznesi, raportoi kjo e përditshme britanike.
“Kjo është pjesë e ringjalljes sonë ekonomike dhe e rëndësishme për ne. Po, ne eksportojmë municionet tona.”
Tashmë pritet të shihet nëse ky shkrim në Sputnik është vërtetë pjesë e shqetësimit të Kremlinit për sjelljen e Beogradit zyrtar ndaj Kievit, apo kemi të bëjmë me propagandë ruse për të ndihmuar Aleksandar Vuçiç i cili është në pikë të hallit me Brukselin, për shkak të politikën së paharmonizuar me BE-në dhe mbështetjen e politikës kriminale të Vladimir Putinit.
