Shërimi i Prof.Krajës/ Lajm i gëzuar, Basha: Qeveria të zbatojë kërkesat e OBSH. Sot sa nuk është vonë!
Duke e vlerësuar si lajm të gëzuar shërimin e Prof.Dhimitër Krajës, Kryetari i Partisë Demokratike, Lulzim Basha, thotë se në këto ditë të vështira të gjithë mjekët, laborantët, infermierët, sanitarët e shoferët e ambulancave, që rrezikojnë çdo ditë jetët e tyre në shërbim të qytetarëve, meritojnë angazhimin serioz të qeverisë për të siguruar të gjitha mjetet e nevojshme mbrojtëse për ekipet mjekësore.
“Testimi është mënyra më e suksesshme që po aplikohet sot për të identifikuar të prekurit nga COVID-19 dhe për të shkëputur zinxhirin e transmetimit,” thekson Lulzim Basha në reagimin e tij përmes rrjetit social Facebook duke shtuar se transparenca është garanci dhe siguri si për stafet mjekësore, ashtu dhe për të gjithë qytetarët ndërsa përfundon:
Duhet vepruar sot, çdo ditë e humbur na kushton jetë dhe shëndet!
Ja postimi i plotë:
Është një lajm i gëzuar për mua personalisht dhe për çdo bashkëqytetar shërimi i prof. Dhimitër Krajës.
Mendimet dhe lutjet tona shkojnë për të gjithë personelin mjekësor që po përballet sot me COVID-19. Për të gjithë ata mjekë, laborantë, infermierë, sanitarë e shoferë ambulancash, që rrezikojnë çdo ditë jetët e tyre në shërbim të qytetarëve. Në këto ditë të vështira ata meritojnë angazhimin serioz të qeverisë për të siguruar të gjitha mjetet e nevojshme mbrojtëse për ekipet mjekësore.
Transparenca është garanci dhe siguri si për stafet mjekësore, ashtu dhe për të gjithë qytetarët. Testimi është mënyra më e suksesshme që po aplikohet sot për të identifikuar të prekurit nga COVID-19 dhe për të shkëputur zinxhirin e transmetimit.
Prandaj, sa nuk është vonë, qeveria duhet të zbatojë korrektësisht kërkesën standarde të OBSH: rritjen e numrit të testimeve. Çdo shmangie nga kërkesat e përsëritura nga OBSH është papërgjegjshmëri e rëndë që jo vetëm fsheh të vërtetën, por kushton shtrenjtë: Sa më pak testime, aq më pak persona të identifikuar, aq më gjatë shumë zgjatet zinxhiri i infeksionit, aq më gjatë vazhdon karantina dhe thellohet kriza ekonomike.
Duhet vepruar sot, çdo ditë e humbur na kushton jetë dhe shëndet!
