Shit-Blerja e votës, PDK dhe Vetëvendosje akuza të ndërsjellta
Partia Demokratike e Kosovës, PDK, dega në Prizren, ka njoftuar se brenda një ore në Qendrën e Votimit 2003a në Prizren, janë arrestuar dy persona, të cilët, sipas PDK-së, janë aktivistë të Vetëvendosjes të cilët u zunë në flagrancë duke blerë vota. Ndërkohë Vetëvendosje e sa thekson se PDK e kapur në flagrancë, akuzon të tjerët”.
PDK dega në Prizren, saktëson se pas veprimeve të dy aktivistëve të Vetëvendosjes ka ndërhyrë Policia e Kosovës dhe ka arrestuar dy personat.
“Partia Demokratike e Kosovës, duke dënuar ashpër sjelljen e aktivistëve të Vetëvendosjes, njofton opinion e gjerë, se kjo skenë e mashtrimeve të Vetëvendosjes, ka ndodhur edhe në zgjedhjet e kaluara. Andaj, të gjithë vëzhguesit e PDK-së, do të jenë në krye të detyrës, për ruajtjen e votës dhe të vullnetit të qytetarëve. Me këtë rast u bëhet thirrje edhe vëzhguesve të subjekteve tjera politike dhe OJQ-ve, monitorues të zgjedhjeve, t’i raportojnë rastet e tilla. Vota e secilit është e shenjtë dhe nuk do të lejohet, që askush të abuzojë me të drejtën legjitime të qytetarëve,” thekson PDK.
PDK, në Prizren, me këtë rast ka falënderuar Policinë e Kosovës, “të cilët janë në shërbim të qytetarëve për parandalimin e veprave kriminale, siç janë vjedhja dhe blerja e votave”
Vetëvendosje në Prizren denoncon dy raste
Ndërkohë Shefi i shtabit zgjedhor të Qendrës së Lëvizjes Vetëvendosje në Prizren, Karanfil Haxhillari ka pohuar se komisionerët e këtij subjekti politik kanë denoncuar dy raste të fotografimit të votës.
“Në qendrën e votimit 2003a, në SHFMU Abdyl Frashëri në Prizren, kryesuesi i vendvotimit, Ardi Pulaj i LVV ka vënë re një qytetar duke fotografuar votën në kabinën e votimit. Menjëherë e ka lajmëruar policinë, policia e ka shoqëruar qytetarin në stacion, për ta intervistuar. Vota, e cila u bë e pavlefshme, u pa nga komisionerët se ishte e PDK-së. Ky është rasti për të cilin PDK akuzoi LVV për kinse blerje votash. Pra PDK e kapur në flagrancë, akuzon për shkeljet që bën vetë,” tha Haxhillari duke shtuar se një informatë tjetër ka të bëj me qendrën e votimit në ShFMU “Mustafa Bakiu”, ku “komisionerja e LVV e zbulon një qytetar duke bërë fotografimin e votës dhe e raporton tek kryesuesi dhe Policia”. “Policia e shoqëron për intervistim qytetarin në fjalë”.
Shefi i shtabit zgjedhor të Qendrës së Lëvizjes Vetëvendosje i ka bërë thirrje votuesve që të mos fotografojnë votat e tyre.
“Komisionerët e vëzhguesit tanë do të raportojnë secilin rast. Komisionerët e vëzhguesit tanë janë të përgatitur për ta mbrojtur votën.”.
Ndërsa kryetari i Komunës së Prizrenit, Mytaher Haskuka në rrjetet sociale ka theksuar se “me raportimin e komisionerëve të Lëvizjes Vetëvendosjes, dy persona janë arrestuar për fotografim të votës. Në rastin në sh.f. “Avdyl Frashëri” vota ishte e PDK-së”.
Duke shprehur qëndrimin se “fotografimi i votës është vepër penale”, dhe se “komisionerët dhe vëzhguesit tanë janë në nivel të detyrës dhe NUK do të lejojmë abuzimin me vullnetin qytetar” Haskuka përfundon:
“PDK-ja si gjithmonë me shpifje, por paratë e pista të tyre nuk mjaftojnë për ta blerë vullnetin e popullit.”
