Shkarkimi i Besnik Muçit/ Përplasja me Metën, Balla: Konflikt i panevojshëm, do mbajë përgjegjësi…

Pas shkarkimit të Besnik Muçit nga KPA, në emër të mazhorancës ka reaguar Kryetari i Grupit Parlamentar të Partisë Socialiste, Taulant Balla, duke theksuar se vendi ndodhet në një situatë të një konflikti të panevojshëm dhe është presidenti ai i cili po tenton bllokimin e Reformës në Drejtësi.

“Më mirë një gjykatë me 4 anëtarë dhe të tjerët që janë në proces sesa me shejtanin brenda. Duhet të kuptojmë thelbin e parimit të vettingut, sa kohë kualifikohesh në raundin e parë, vijon detyrën në të gjitha nivelet dhe kjo është e qartë.

Ne jemi në një situatë të një konflikti të panevojshëm kronik të krijuar nga presidenti në përpjekje për të penguar reformën ne Drejtësi, Kuvendi një javë më parë theksoi mes rezolutës së miratuar me shumicën dërrmuese, nevojën për ti bërë apel presidentit për të reflektuar për ta kthyer presidencën në shinat e kushtetuetshmërisë.”

Taulant Balla mendon se duhet të shtohen mekanizma zhbllokues ndonëse partia e tij dhe vetë presidenti, mazhorancë kjo që shkatërroi këtë vend janë vetë bllokimi:

“Ne si kuvend duhet të ndërmarrim hapa për shtimin e mekanizmave zhbllokues. Uroj e besoj që presidenti i vendit të mos krijojë vonesa qoftë edhe një minutë të vetme në funksionalitetin e domosdoshëm të SPAK dhe Gjykatës së këtij niveli, duhet të kuptojmë që vendi është në një moment historik, riktheksoj detyrat e përcaktuara nga Bundestagu,” thekson kryetari i Grupit Parlamentar të PS, Taulant Balla duke shtuar se detyra e tyre është, përmbyllja e Reformës Zgjedhore, ndërsa përfundon:

“Ne duhet t’i qëndrojmë strikt për të patur në fillim të vitit të miratuar paketën për adresimet e rekomandimeve të OSBE. Gjykata Kushtetuese është në rrugë të mbarë të funksionalitetit. Gjykata e lartë është në proces, SPAK është në proces, Shqipëria është në rrugë të mbarë drejt krijimin e institucioneve të drejtësisë. Kush pengon krijimin e tyre do të mbajë përgjegjësi.”