Shkarkimi i Presidentit/ Konfirmohet, “Opozita e Edi Ramës” është kot në Parlament

Komisioni për hetimin e Presidentit të Republikës ndonëse ishte mbledhur sot për të miratuar planin e punës, i bëri të ditur “Opozitës së Edi Ramës” se nuk janë kot vetëm në seancë plenare por edhe në Komisione Hetimore.

Pasi Kryetari i Komisionit, Ulsi Manja, tha se i është kërkuar një opinion Komisionit Venecias dhe përfaqësuesit e saj do ta vizitojnë Tiranën më 10-11 shtator, deputeti e Kryetari i “Ballit të Edi Ramës”, Adriatik Alimadhi, pyeti se kush ishte hartuesi i kërkesës që është bërë për Komisionin e Venecias dhe pse nuk ka kaluar në këtë Komision Hetimor, përgjigja e Ulsiut ashtu si dhe miratimi i Planit të Punës së këtij Komisioni dëshmuan se kjo opozitë është kot si në seanca plenare ashtu dhe komisione. Ulsiu i dha të drejtë ballistit të Edi Ramës por asgjë ndryshoi në zbatimin e planit të rilindjes për shkarkimin e Ilir Metës.

“Lidhur me hapat proceduralë që unë propozoj të ndiqen nga komisioni sipas këtij plan hetimi deri në përfundim të hetimit të jenë seancë dëgjimore me Presidentin e Republikës si detyrim i nenit 112 pika 3 të rregullores së Kuvendit. Një panel ekspertës të Komisionit të venecias që ne i kemi kërkuar një opinion për objektin e hetimit. Do të jenë në tiranë nga 9-11 shtator sipas një axhende paraprake të rakorduar mes Kuvendit dhe Komisionit të Venecias. Në datë 10-11 do të kenë takime me aktorët politikë të mazhorancës dhe opozitës, me kryetarin e Kuvendit, kryeministrin, do ketë dhe një takim të veçantë me anëtarët e komisionit hetimor në 11,” tha Ulsi Manja duke bërë të ditur se gjatë muajit korrik dhe gusht i kanë kërkuar informacion 7 institucioneve për objektin e hetimit.

“Komisioni i posaçëm hetimor bazuar në ligjin për komisionet hetimore u është drejtuar gjatë muajve të verës, në periudhën korrik dhe gusht disa institucioneve shtetërore u është kërkuar dokumentacioni i duhur në lidhje me objektin e hetimit. U jemi drejtuar me shkresë për të sjellë në sekretarin e komisionit dokumentacionin e duhur qendrës së botimeve zyrtare, drejtorisë së policisë së shtetit, presidencës, Ama, kolegjit zgjedhor pranë gjykatës së aplit, KQZ dhe Prokurorisë së Përgjithshme.”

Në fund, para miratimit të Planit të punës, Kryetari i Komisioni Hetimor, Ulsi Manja, është munduar të sqaroj se ky komision hetimor në zbatim të rregullores është ngritur mbi bazën e vendimit 84 të vitit 2019 dhe do të duhet ta përfundojë veprimtarin në 9 tetor 2019:

“Faza e dytë është ajo e Gjykatës Kushtetuese. Ngritja dhe bërja funksionale e Gjykatës Kushtetuese nuk na pengon kuvendin që të përmbyllë këtë detyrë që i ka ngarkuar Kuvendi.”

Kështu, Komisioni Hetimor miratoi planin me vetën një votë kundër. Presidenti Ilir Meta pritet që javën e ardhshme të thirret seancë dëgjimore ndërsa data u la për tu dakordësuar.

Pas këtij vendimi ka reaguar menjëherë Presidenti i Republikës:

“Propaganda anti-President nuk ndihmon sundimin e ligjit që është kusht për çeljen e negociatave në 18 tetor nga Bashkimi Europian për vendin tonë.  Spostimi i vëmendjes për momentin nga detyrimi për respektimin e dekretit në fuqi të 13 tetorit për zgjedhje gjithëpërfshirëse vendore nuk ndihmon për zgjidhjen e krizës, por ndihmon përshkallëzimin e saj,” thekson në reagimin e tij përmes rrjetit social Facebook, Presidenti Ilir Meta.

Plani për hetimin e Presidentit:

1-Seancë dëgjimore me Presidentin e Republikës, në zbatim të nenit 112, pika 3 të Rregullores së Kuvendit.

2-Administrimi dhe shqyrtimi i informacioneve, të dhënave, raporteve të marra nga institucionet lidhur me objektin e hetimit.

3-Administrimi i raportit të Komisionit për Çështjet Ligjore, Administratën Publike dhe të Drejtat e Njeriut “Për shqyrtimin e kërkesës së një grupi deputetësh për nisjen e

4-procedurës së shkarkimit nga detyra të Presidentit të Republikës, z. Ilir Meta”, datë 26.06.2019.

5-Administrimi dhe shqyrtimi i Opinionit të Komisionit të Venecias.

6-Diskutim në lidhje me gjetjet e Komisionit Hetimor sipas objektit të hetimit.

7-Përgatitja dhe miratimi i raportit përfundimtar.

8-Paraqitja në Kuvend i raportit përfundimtar.