Shkarkimi i Presidentit/ “Ligjet”, miratohet ngritja e Komisionit Hetimor

Edi Rama vazhdoi dramën e tij antiligjore “Shkarkimi i Presidentit” në Komisionin e Ligjeve. Pasi u prezantua Raporti nga relatori i çështjes, deputeti rilindas Adnor Shameti, Komisioni i Ligjeve, me 13 vota për dhe një kundër, miratoi raportin me propozim për Parlamentin e Shqipërisë për ngritjen e Komisionit Hetimor për Presidentin e Republikës, ku do të hetohen shkeljet e Kushtetutës nga ana e tij me Dekretin që anulon datën e zgjedhjeve vendore të 30 qershorit, dh eme qëllim të shkarkimit të tij.

Deputeti Shameti tha se kërkuesit për shkarkimin e Presidentit vlerësojne se kreu i shtetit ka shkel Kushtetutën me nxjerrjen e Dekretit për anulimin e zgjedhjeve lokale të 30 qershorit.

“Përgjigja e institucionit të Presidentit tregoi qartazi se nuk kishte interes të degjohej në komision. Pergjigja kishte një gjuhë fyese dhe ironike.” tha Shameti, duke theksuar më tej se KQZ nuk e mori në konsideratë dekretin e Presidentit dhe vijoi punën.

“Kuvendi miratoi rezolutën ku nuk njohu vlefshmërinë e aktit të Presidentit dhe kërkoi vijimin e punës nga institucionet për organizimin e zgjedhjeve të 30 qershorit. Deputët mendojnë se presidenti ka cënuar parimin e periodicitetit të zgjedhjeve, parimin e ligjshmërisë, ka cënuar parimin e të drejtës së qytetarëve për të zgjedhur e për t’i zgjedhur, ka marrë kompetencat e Prlamentit.”

Votë kundër këtij raporti, i cili do i dërgohet Kuvendit në seancën e 4 korrikut, dha kreu i Ballit Kombëtar, Adriatik Alimadhi.