“Shkarkimi i Trumpit”, Me Presidentin Biden dhe 6 Janarin, Pelosi bindi vetëm edhe 2 ligjvënës…
Kush po tallet dhe kush po e përdhos demokracinë në Amerikë e dëshmoi votimi i sotëm për shkarkimin e Presidentit të SHBA, Donald Trump, duke e akuzuar zyrtarisht për nxitje të revoltës një javë pasi, siç u tha, mbështetësit e tij sulmuan me forcë Kongresin.
Nëse i shtojmë këtij votimi edhe aktrimin e Kryetaes së Dhomës së Përfaqësuesve, Nancy Pelosi, se i thyhet zemra që është pjesë e një tjetër procedure shkarkimi, atëherë rezultati i votimit tregon se sa poshtë ka ra politika në Amerikë.
“Ma thyen zemrën. Kjo gjë duhet të na thyejë zemrat të gjithëve. Unë qëndroj përpara jush si zyrtare e kushtetutës, si grua, si nënë, si gjyshe, si vajzë – vajzë, babai i së cilës ka shërbyer me krenari në këtë Kongres,” tha Pelosi por bindi vetëm 2 kongresmen më shumë se sa në përpjekjen e parë për shkarkimin e Presidentit Trump në vitin 2019 kur 230 ligjvënës të Dhomës së Përfaqësuesve votuan për dhe 197 ishin kundër ndërsa Senati e hodhi poshtë.
Kështu, demokratët tashmë me Presidentin Joe Biden, dhe 6 Janarin në xhep, morën vetëm 232 vota në Dhomën e Përfaqësuesve për shkarkimin e Presidentit Trump dhe zyrtarizimin e akuzave dhe ndonëse u mbështetën nga 10 republikanë, sërish 197 ligjvënës ishin kundër shkarkimit të Presidentit të SHBA.
Dhe, kur gjithçka rezultoi spektakël kur tashmë është e qartë se nuk e konfirmojnë dot me 2/3 në Senat, vazhdoi degjenerimi i politikës amerikane nga demokratët, e Pelosi e hodhi topin te Senati:
“Presidenti duhet të dënohet nga Senati, i cili do të sigurojë se republika do të jetë e sigurt nga ky njeri, i cili është kaq i vendosur për të shkatërruar gjërat që i duam dhe na mbajnë bashkë.”
Lideri i shumicës në Senat, republikani Mitch McConnell, i ka thënë demokratit Chuck Schumer se ai nuk ka gatishmëri për të organizuar seancë urgjente për të shqyrtuar largimin e Trumpit nga zyra, pas përfundimit të procedurave në Dhomën e Përfaqësuesve, ka thënë një zëdhënës i McConnellit.
Ndërkohë që po diskutohej për shkarkimin e Presidentit, Shtëpia e Bardhë ka lëshuar një komunikatë në emër të Trumpit, i cili ka bërë thirrje për qetësi.
“Lidhur me raportimet për më shumë demonstrata, ju bëj thirrje që të mos ketë dhunë, të mos ketë shkelje të ligjit, dhe të mos ketë vandalizëm të çfarëdo lloji,” tha Presidenti Trump duke përfunduar:
“Kjo nuk është ajo në të cilën besoj unë dhe as Amerika. U bëj thirrje të gjitha amerikanëve të ndihmojnë në uljen e tensioneve dhe të qetësojnë gjakrat. Faleminderit.”
Ndryshe, demokratët edhe dje zhvilluan një dramë komike në Dhomën e Përfaqësuesve. Me 223 vota për dhe 205 kundër kjo Dhomë miratoi një rezolutë nëpërmjet së cilës i kërkohej Zv/Presidentit Mike Pence dhe anëtarëve të Kabinetit të Presidentit Trump të përdorin autoritetin që i jep Kushtetuta duke larguar Presidentin nga detyra për paaftësi ndonëse Zv/Presidenti Pence e kishte bërë të qartë se nuk do të veproj bazuar në Amandamentin 25.
Madje para votimit të rezolutës, u bë e ditur se Zv/Presidenti Mike Pence e kishte sqaruar përmes një letre zonjën Pelosi se ai nuk do të merrte veprime bazuar në Amendamentit 25-të të Kushtetutës së SHBA, sipas të cilit Zv/Presidenti dhe shumica e anëtarëve të kabinetit deklarojnë një president të paaftë duke e shkarkuar atë nga detyra.
