Shkarkimi Presidentit Republikës, Gjykata Kushtetuese: Vendimi brenda 30 ditësh!

A do të shkarkohet Presidenti i Republikës, Ilir Meta?! Pasi u dëgjuan palët, Gjykata Kushtetuese u tërhoq dhe vendimin pritet ta publikoj brenda 30 ditësh.

Seanca e cila nisi në orën 10:00 u ndërpre për rreth një orë pasi Gjykata Kushtetuese kaloi në diskutimin përfundimtar për vendimin rreth shkarkimit të Presidentit të Republikës, Ilir Meta.

Kryetari i Grupit parlamentar të PS-së, Taulant Balla, në fund të seancës në Gjykatën Kushtetuese si përfaqësues i Parlamentit kundërshtoi rastin e Rumanisë dhe deklaroi se presidenti rumun ka të tjera kompetenca nga ato të presidentit të Shqipërisë. Sipas tij, vendimi në rastin e përplasjes mes Parlamentit të Rumanisë dhe Presidentit në 2007 duhet lexuar në këtë frymë dhe duhet lexuar i plotë, jo me paragrafë.

Ndërsa përfaqësuesja e Parlamentit, deputetja e PS, Klotilda Bushka tha se Presidenti ka shkelur rëndë neutralitetin që duhet të mbajë si mbrojtës i unitetit.

“Nga Kuvendi, eshte vertetuar qe presidenti ka shkelur rende Kushtetuten dhe i kerkojme gjykates te kryet shkarkimi i presidentit. Ka shkelur te drejtat e njeriut duke cenuar te drejten per te zgjedhur dhe per t’u zgjedhur. Keto i ka bere gjate paraqitjeve te tij ne emisione, neper rrjete sociale apo deklarata. Ai ka bere sugjerime duke u thene qytetareve kë te votojne, gje qe ka ndikuar ne voten e qytetareve. Ne kete proces, kuvendi ka vepruar ne baze te Kushtetutes dhe ne kete rast eshte ne detyre te kuvendit qe te mbroje Kushtetuten. Presidenti ka shkelur rende neutralitetin qe duhet te mbaje si mbrojtes i unitetit.

Presidenti nuk ka asnjë argument që atij i janë cenuar të drejtat. I vetmi argument ishte ai që vazhdimësia e legjislaturës së 9 nuk i takon asaj të 10-të. Askund nuk shkruhet ky fakt. Dhe po qe ashtu, edhe vetë posti i presidentit, i cili u zgjodh në legjislaturën e 8-te, nuk duhet të vazhdonte në të 9-ën,” tha Bushka.

Këshilltari ligjor i Presidentit të Republikës, Bledar Dervishi, fillimisht i kërkoi Gjykatës Kushtetueses të shpallë deklarimin si të papajtueshëm me Kushtetutën të vendimit për ngritjen e Komisionit Hetimor për shkarkimin e Presidentit, pasi sipas tij Parlamenti s’ka të drejtë të ngrejë komisionin hetimor parlamentar në 4 muajt e fundit të funksionimit të tij ndërsa dha edhe pretendimet përfundimtare.

“Kuvendi si organi legjislativ, e trajton këtë çështje si goditje ndaj presidentit, Kuvendi nuk kishte lëndë. Presidenti nuk ka kryer asnjë shkelje, e aq më pak të rëndë të Kushtetutës. Ne pame nga afër se ku mbërriti Kuvendi për qëllime politike. Shkoi deri aty sa u manipuluan akte admistrative të brendshme për të rrëzuar pretendimet e presidentit. Shkeljet procedurale të Kuvendit kanë qenë të vazhdueshme, të shumta, të përsëritura. S’kanë sesi të çojnë në një rezultat të ligjshëm, të vlefshëm. Kërkesa e Kuvendit s’ka legjitimitet.
Vendimi 55 i Kuvendit është në vetvete asgjë më shumë se kërkesa që vë në lëvizje gjykatën, e cila sipas gjykimit tonë, duhet ta kryente atë nga momenti i administrimit në 9 shtator 2021.

Kuvendi ka shkelur në çdo hap procedurën e kthen procesin tërësisht politik. Provat e marra përmes një procesi të rregullt ligjor, janë të papërdorshme dhe te pavlefshme. Të gjitha provat që pretendon Kuvendi janë marrë në shkelje të Kushtetutës. Produkti është nul. Pavlefshmëri, antikushtetuetshmëri. Refuzimi për të dëgjuar presidentin ka sjellë proces të parregullt,” tha Dervishaj duke përsëritur se Presidenti kurrë nuk ka mbështetur asnjë subjekt politik.

Ndryshe, në fillim të seancës, Kryetarja e Gjykatës Kushtetuese, Vitore Tusha, ka bërë të ditur se Parlamenti u vuri në dispozicion përgjigjet e pyetjeve.

“Dokumentet e Kuvendit u janë shpërndarë anëtarëve të trupit gjykues dhe një kopje e tyre i është dërguar Presidentit,” tha Tusha ndërkohë Këshilltari i Presidentit, Bledar Dervishaj, shprehu shqetësimin në lidhje me provat e Parlamentit, të cilat sipas tij, u sollën me urgjencë ndërsa anatemoj vërtetësinë e provës nga Parlamenti:

“Bëhet për të hedhur poshtë pretendimet e presidentit. Kjo është urgjenca, ne e kuptojmë. Por Kuvendi s’mund të ndërhyjë te prova, te vërtetësia e saj. Me datë 4 shkurt Gjykata na dërgoi një shkrese të Kuvendit. Që prej datës 1 korrik I jemi referuar nr të kryetarit 06.05.2021 dhe jo 05.05.2021 siç e përcjell Kuvendi. Është në format me nënshkrimin e kryetarit. Nuk mund të caktohej data 7 për mbledhjen e Kuvendit, sepse raporti nuk ishte formësuar. Nëse do të krahasojmë pikën 20 të urdhrit të kryetarit, me pikën 20 të rendit të ditës, edhe titulli ndryshon. Kjo vë në dyshim të fortë vërtetësinë e provave të sjellë. Gabimi më trashanik është urgjenca sesi është sjellë kjo provë e Kuvendit, e cila nuk është  e vërtetë, por ka si qëllim të hedhë poshtë atë çka pretendon presidenti,” tha Këshilltari ligjor i Presidentit Republikës.

Pas pretendimeve të Presidencës, trupa gjykuese e Gjykatës Kushtetuese drejtoi 70 pyetje ndaj tyre dhe ishte numri i madh i pyetjeve arsye që juristët e Presidencës të kërkonin 48 orë kohë për të kthyer përgjigje, që sipas premtimit të Presidentit të Republikës, Ilir Meta. pritet të publikohen nesër në orën 09:00.