Shkarkohet Altin Basha, Drejtor i Teatrit Kombëtar komandohet Indrit Çobani

Pas shkarkimit të Altin Bashës, Ministria e Ekonomisë, Kulturës dhe Inovacionit ka komanduar si Drejtor të Teatrit Kombëtar, regjisorin Indrit Çobani.

Duke bërë të ditur se me propozim të Ministrisë së Ekonomisë, Kulturës dhe Inovacionit, Këshilli i Ministrave ka shkarkuar Drejtorin e Përgjithshëm të Teatrit Kombëtar, Altin Basha, Ministria sqaron se do të çelë një proces përzgjedhjeje për drejtues të ri të Teatrit.

“Ndryshimi synon në përmirësimin e nivelit drejtues dhe të cilësisë së mirëmenaxhimit ekonomiko-financiar dhe administrativ, rritjen e transparencës institucionale dhe sjelljen e një fryme të re komunikimi publik dhe bashkëpunimi ndaj komunitetit artistik e profesional,” thekson Ministria e Ekonomisë, Kulturës dhe Inovacionit duke shtuar se me zbardhjen e vendimit, drejtues i përkohshëm i Teatrit Kombëtar do të komandohet regjisori Indrit Çobani.

Ndryshe, Këshilli i Ministrave shkarkoi Drejtorin e Përgjithshëm të Teatrit Kombëtar, Altin Basha, për shkak të shpërdorimit të fondeve të Teatrit Kombëtar.