Shkel Kodin jep 5000 lekë për pensionistë, Rama: S’mund t’i shkojë ndërmend njeriu që mund të na pengojë!
Një muaj para zgjedhjeve të 14 Majit, Kryeministri Edi Rama premtoi rritje të pagës mesatare 900 euro si dhe një dhuratë për pensionistë në muajin prill prej 5.000 lekëve ndërsa në vërjetjen e gazetarëve se kemi të bëjmë me shkeljen e Kodit Zgjedhor, Kryeministri Rama foli me një gjuhë që nuk e ka përdor as diktatori Enver Hoxha në ditët e tij më të zeza, duke e bërë të qartë se s’mund t’i shkojë ndërmend njeriu që mund ta pengojë të bëjë këtë gjë për pensionistët!
“Do flasim për një rritje pagash që synon ngritjen në harkun e këtyre dy viteve, të Shqipërisë në nivelin e lartë të rajonit. Synojmë të realizojmë një target të një page mesatare prej 900 eurosh që do të thotë se jemi në kushtet e një mundësie të re, një mundësi që do ta shfrytëzojmë maksimalisht në mundësi të njerëzve dhe pas rritje së pagës minimale mund të shkojmë drejt rritjes së pagës mesatare.
Do të kemi një rritje tani së shpejti për një pjesë të shkallëzuar, detajet do i diskutojmë pas aktit të miratimit, për një periudhë për 15 vitet e ardhshme. Do i qëndrojmë zotimit për rritjen e pagës së mjekëve dhe infermierëve me 7%. Ndërkohë që mjekëve specialistë paga iu rrit me 50 mijë leke të reja çdo muaj. Më pas do shkojmë te rritja e konsiderueshme.
Për të tjera kategori do kemi rritje të tjera. Jemi në kushtet kur mund t’ju themi se pensionistëve se zotimin për të shpërndarë drejt tyre taksën e jashtëzakonshme që vumë mbi eksportuesit e mëdhenj të energjisë do ta mbajmë sikundër e thashë dhe më parë. Sot nuk kemi vetëm zotimin e përgjithshëm, por dhe informimin konkret se për pensionistët do ketë dhe 5 mijë lekë të reja që do shkojnë bashkë me pensionet që do marrin herën e ardhshme,” tha Edi Rama ndërkohë i pyetur nëse ky vendim bie ndeshë me Kodin Zgjedhor pasi merret pak para fushatës, duke e cilësuar këtë Kod kinezëri shtoi:
“Këto janë çështjes dhe zotime që janë marrë denbabaden dhe nuk kanë lidhje me kodin zgjedhor dhe zgjedhjet. Për pensionistët që janë mbi të gjithë dhe që për një mijë e një arsye kanë dhënë më shumë se të gjithë dhe nga kjo histori ndryshimi kanë marrë më pak, s’duhet t’i shkojë në mendje askujt ta bëjë këtë pyetje. Ky për pensionistët është një adresim në vazhdim i një problemi siç ekzistonte dhe më parë, se qeveria është aty, në mbrojtje të të gjithë familjarëve, dhe bizneseve të vogla. S’mund t’u them se do prisni disa muaj se kanë vendosur partitë, ato kinezëritë. I respektojmë ato kinezëri që i kemi bërë vetë, por s’mund t’i shkojë ndërmend njeriu që mund të na pengojë ne të bëjmë këtë gjë për pensionistët,” tha Edi Rama duke krijuar se nuk e zë gjumi për pensionistët ndonëse 10 vjet nuk u rriti ato pensione të mjera as edhe 1 lek dhe u kujtua 50 ditë para zgjedhjeve!
Në fund, harbutërinë e dëshmoi edhe ndaj dy institucioneve më të rëndësishme të vendit, Presidentit të Republikës dhe Shërbimit Informativ të Shtetit. I pyetur pse nuk po dekretohet kreu i SHISH që ka propozuar, Vlora Hyseni, nga ana e Presidentit Bajram Begaj, apo ka të bëjë me inofrmacione nga takimi i fundit me zotin Albi Kurti, Kryeministri Edi Rama në siklet shtoi një tufë fjalësh dhe iku:
“Nga unë do të dëgjoni, pagat , ekonomia, mirëqenia e njerëzve dhe transformimi i përgjithshëm Këto thashethemet e katundit tonë politik dhe mediatik i kemi bërë bashkë për shumë vite dhe unë nuk kam më shumë kohë për këto pyetje.”
