Shkelës të ligjit thirrni policinë, Ministri Çuçi: Policia nuk mund ta ndjekë çdo makinë ose sherr!
Sot kur i gjithë bregdeti është në duart e krimit, kur vritesh për shezlongë ose në rastin më të mirë shehë shezlongët që janë pronë e jotja nën flakë, Ministri i Brendshëm, Bledi Çuçi edhe pas fundjavës me 9 të vdekur e thotë qartë: “Policia nuk mund të ndjekë çdo makinë në vend dhe as të parandalojë një sherr në orën 01:00 të mëngjesit!” Dhe jo vetëm kaq! Ministri i Brendshëm tha se nuk ndien as përgjegjësi morale e ata që në të ardhmen duan të bëjnë aksident ose të vrasin për shezlongë, mund ta thërrasin Ministrin e Brendshëm në mënyrë që të mos ketë shkelje ligji dhe vrasje.
“Në lidhje me përgjegjësinë morale, e para si njeri do doja të mos kishte asnjë vrasje, të mos kishte asnjë aksident, të ishte një situatë idilike. Këtë e dëshiroj, por sigurisht do ishte utopi, nuk ka ndodhur as në komunizëm ku kishim çdo gjë nën kontroll, nuk kishte as mjet. Nuk mund të kem përgjegjësi morale për një gjë që është e zakonshme, meqë ndodh pavarësisht nga ne. kështu që nuk ndiej ndonjë përgjegjësi morale, madje do doja që në fund të mandatit tim t’i ruaja këto statistika dhe këtë trend. Do ndihesha shumë mirë që si ministër i brendshëm në fund të mandatit tim ta ulja këtë trend. por jo gjithmonë varen nga ministri këto gjëra,” tha Çuçi duke shtuar se këto dy raste kërkojnë reflektim.
“Policia e Shtetit as nuk ndjek çdo makinë dhe as nuk mund të parandalojë një sherr në orën 1 të natës mes dy fqinjëve. Dy raste kërkojnë reflektim nga të gjithë përfshirë këtu edhe policinë e shtetit. Policisë do ti vëmë në dispozicion edhe dronët super inteligjent. Policia ndalon dhe nuk dënon shkelës kriminelë. Nga muaj i fundit ne kemi shtrënguar masat e armëve pa leja. Janë ndaluar tre persona së fundmi me precedencë penale.”
Për këtë situatë të krijuar ka fajtor, dhe Ministri i Brendshëm, Bledi Çuçi, ashtu si shefi i tij e drejton gishtin nga prokrurët dhe gjyqtarët.
“Faktet janë krejt ndryshe nga të paktën çka qenë perceptimi për këtë ngjarje fatale. Këtu janë statistikat që nga viti 2015. Me përjashtim të 2020, që ka qenë 2 muaj lockdoën, në 2021-in, nga të gjitha drejtuesit, të plagosurit rëndë dhe lehtë, 2021-i është viti më i mirë në të gjitha këto vite. Duke qenë se në 2016-ën ka pasur mbi 900 aksidente, tanimë ka mbi 600. Nëse në 2016-ën ka pasur 130 humbje jete, në gjashtë mujorin e parë nga aksidentet, në këtë 6 mujor janë 102. Shihet nga statistikat që është viti më i mirë. Në lidhje me vendimin e qeverisë, në bazë të ligjit të ri që miratuam për Gardën e Republikës, qeveria mund të shtojë nivelin e sigurisë për administratorët e lartë, ne vendosëm për zotin Soreca”
Dhe, delirant si shefi i tij Kryeministër, për vendin kur vritesh pse je duke lëvizur me makinë me shpejtësi të lejuar dhe mbron shezlongin me kallashnikov, Ministri i Brendshëm thotë se legjislacioni shqiptar është nga më të fortat në këtë drejtim, sa i takon ashpërsisë së aksidenteve”
“Problem është zbatimi i ligjit. Përmenda emra konkretë. Padiskutim që ndjeshmëria më e madhe e shqiptarëve sot është kjo gjë. A zbatohet ligji, a dënohen ato që e dhunojnë ligjin dhe duhet të jemi transparentë, llogarinë e kemi me shqiptarët. Unë jam deputet, ministër, në këtë kuadër ne jemi ato që ballafaqohemi me njerëzit, dua të jem i drejtpërdrejt me njerëzit që ata ta kuptojnë se nga buron kjo gjë. Ku Policia e Shtetit kap në flagrancë një person me plumb në fole gati për qitje dhe trupa gjykuese vendos që ai të shkojë në shtëpi, edhe ata duhet të dalin dhe të sqarojnë popullin.
Ka prokurorë dhe gjykatës që s’e kanë kaluar VETINGUN, pikërisht anëtarë të organizatës KÇK janë ata që se kanë kaluar VETINGUN. Në raste flagrante i gjejmë te ky grup. Sa i takon detyrimeve të mira si ministër, unë do e zbatoj vendimin e gjykatës, pa më të voglën hezitim. Por duhet të bëjnë ankimet te drejtësia e re dhe ILD. Ne kemi bërë ankesa më përpara, ju jap dhe shkresën po të doni. Do të ketë ndryshime në nivel drejtues te Policia e Shtetit. Sepse nëse procesi gjyqësor nuk ka një organ epror për të zhbërë vendimet, policia është një piramidë, ku e ka të qartë hierarkinë. Kur unë shoh një polici që shkel rregullat, s’bëj hetim, e heq nga puna direkte.
Ndërsa për gjyqtarin, nuk ka një organ që thotë ky vendim nuk bëhet. Në këtë pikëpamje mendoj që përveç nivelit të lartë drejtues që e kam shprehur edhe në Kuvend, ajo që duhet të bëjmë sa i përket Vetingut, ajo duhet bërë për drejtuesit e lartë të policisë, kjo është qasja ime. Vetingu është një proces i vazhdueshëm,” tha Çuçi po kur e vërjeti se doli nga binarët duke shfajësuar plotësisht policinë e cila kontrollon makinat pasi të vriten drejtuesit e saj, shton:
“Unë nuk thashë që përgjithësia është vetëm e gjyqësorit. Sidomos, për krime banale si ajo që ndodhi në Velipojë, përgjegjësia është më e gjerë. Thashë padiskutim që është përgjegjësi e policisë. Unë nxora nga protokolli im rastin më të fundit, me lidhje me një çështje që ka dalë në opinionin publik dhe është armëmbajtja pa leje. Unë në këtë rast sqarova vetëm pozicionin e policisë së shtetit, nuk e bën e vetme Policia e Shtetit, çarmatosjen e armëve të dala nga 97-a. Gjyqësori ka një rol të rëndësishëm në këtë momente. Nëse pyet shqiptarët sot, nëse një kriminel kapet në rrugë me 6 plumba dhe 1 në fole. Kodi Penal thotë që minimumi dënohet me 3 vite, maksimumi 7. Po të pyesësh shqiptarët do të thotë të dënohet me 7 vite. Kjo është perceptim që duhet të reflektojë dhe Gjyqësori. Si e çon këtë njeri në shtëpi të rri rehati, kur ndërkohë ka qenë gati për të vrarë dikë. Prandaj ka shumë rëndësi të funksionojnë të gjitha hallkat.”
Pas situatës së krijuar Ministri i Brendshëm, Bledi Çuçi, tha se do të ketë ndryshime në strukturë dhe në emra në Policinë e Shtetit si dhe do të kalohet në një nivel tjetër në administrimin e territorit.
“Në lidhje me vazhdimin e përmirësimit të punës së policisë, sigurisht që ne jemi në prag të fillimit të një mandati të tretë qeverisës, pa diskutim që edhe në funksion të zbatimit të gjithë programit qeverisës për 4 vitet e ardhshëm është e nevojshme të bëhen ndryshime për t’iu përshtatur dhe vizionit për Shqipërinë 2030 dhe kjo lidhet me ristrukturim dhe me emra konkretë. Do kalojmë në një nivel tjetër në administrimin e territorit. Do jemi në nivelin më të lartë për nga cilësia e teknologjisë për kontrollin e territorit. Edhe emrat dhe ristrukturimi shkojnë bashkë,” tha Çuçi ndërsa për çështjen e mbeturinave në Durrës që tashmë po dekompozohen shtoi:
“është një problem që në fakt ka ekzistuar dhe më përpara dhe agravohet vazhdimisht, sidomos për zonën e Durrësit, deri sa të bëhet një landfill model dhe aty. Unë e kam ndjekur situatën, edhe me kryetaren e bashkisë dhe është gjetur një zgjidhje për t’i çuar diku tjetër ato gjithë pjesën e mbeturinave të Durrësit.
Besoj se këto 2 ditë do marrë një zgjidhje të shpejtë se ku do të depozitohen mbeturinat e Durrësit. Duhet të dini që kjo është një përgjegjësi përtej ministrit të Brendshëm, por disa institucioneve. Kam lehtësuar qarkullimin e mjeteve të rënda përtej qarkut të Durrësit për të mos pasur atë akumulim të mbeturinave.”
Në fund, të gjithë ata që duan të bëjnë aksident ose të vrasin për shkak të shezlonëve, duhet të keni turp nëse këtë e bëni pa e informuar policinë e Bledi Çuçit. E meqpë nuk ka një lajm të mirë për qytetarët ai e ka për kriminelët, tha se do të vazhdoj të jetë ministër i Brendshëm:
“Sa i përket qëndrimit tim në detyrë, do të doja që tek ministri i brendshëm mos të shihni drejtorin e policisë, shihni ministrin e brendshëm. Ka qenë fushata dhe me dashje kam zgjedhur të mos kem profil të lartë për të qenë i paanshëm gjatë fushatës, por kjo nuk ka të bëjë fare me faktin nëse unë do të jem apo nuk do të jem në shtator ministër i brendshëm. Deri ditën që do jem do ta ushtroj këtë detyrë me përgjegjësinë dhe angazhimin më të lartë”
Ndryshe, nuk u kuptua dalja publike e Ministrit të Brendshëm, Bledi Çuçi, pas tronditjes që pësoi opinionin publik gjatë fundjavës ku u shua Familja Gushi në një aksident në aksin Fier-Vlorë, një i moshuar u vra nga një makinë në Tiranë, e diela filloi me vrasjen e katër personave pas një përplasje me armë zjarri në Velipojë për ndarjen e shezlongeve të plazhit, dhe e hëna sërish filloi me sherr për shkak të shezlongëve, 60 prej të cilëve iu vu flaka në Dhërmi.
