Shkëmbimi i territoreve, strategjia e Hashim Thaçit e koordinuar me Edi Ramën
Askush nuk e kuptoi Hashim Thaçin kur e hodhi në tregun e dialogut politik me Aleksandar Vuçiç, idenë e shkëmbimit të territoreve me Serbinë, ku plaçkë e Thaçit ishte Lugina e Preshevës.
Kryeministri Ramush Haradinaj e hodhi poshtë këtë ide vetëm disa orë pasi ishte hedhur në treg, por, sot, gjithçka është e qartë. Madje njohësi i mirë i rrethanave ballkanike dhe kreu i Forumit për marrëdhënie etnike në Beograd, Dushan Janjiç tha për të përditshmen serbe “Blic” se ajo që po ndodhë me Luginën e Preshevës nuk është rastësi, lëvizjet janë të koordinuara dhe për të gjitha këto është i informuar edhe kryeministri shqiptar, Edi Rama.
“Shqiptarët tashmë kanë themeluar Asociacionin e komunave shqiptare dhe kanë miratuar deklaratën e cila është menduar të aktivizohet në momentin kur Serbia e fillon diskutimin për Asociacionin e komunave me shumicë serbe,” tha Janjiç i cili kujton se qysh në vitin 2006 është bërë koordinimi i shqiptarëve nga Presheva, Bujanoci dhe Medvegja me qëllim të përballjes së kërkesave serbe në veri të Kosovës.
“Shqiptarët nga Lugina e Preshevës, asgjë nuk bëjnë vetë, por në koordinim me Prishtinën, dhe për të gjitha këto është i informuar edhe kryeministri shqiptar Edi Rama , ndërkohë për gjithë këtë zhvillim BE nuk ka qëndrim,” thekson Janjiç.
Ndërsa Prof.Ass. Stefan Surlliç pranë Fakultetit të Shkencave Politike në Beograd, thekson se e gjithë kjo situatë mund të lexohet nga deklarata e fundit e Hashim Thaçit. Ky njohës i mirë i ngjarjeve në Kosovë tha se në momentin kur shpalosi planin e tij, Thaçi tha se çfarë do të dëshironte Prishtina, por nuk tha se çfarë i ofron ai Serbisë.
“Ai heshtë pjesën tjetër të zgjidhjes. Mirëpo, kur thotë se nuk ka autonomi për serbët, kjo do të thotë se nuk Asociacion të komunave me shumicë serbe, dhe nuk ka Plan të Ahtisarit. Këtu është edhe çelësi. Unë e lexoj këtë si dhënie të territorit në veri të Ibrit për Serbinë, e ata në jug të Ibrit nuk kanë nevojë për Asociacion. Ai do ti thotë popullit se diçka kemi humbur por kemi fituar Kosovën funskionale,” përfundon Surlliç.
