Shkëmbimi territoreve/ Përgënjeshtron Euobserver, Grenell: Lajm i rremë!

 I Dërguari i Posaçëm i Donald Trump për dialogun Kosovë-Serbi, Richard Grenell, ka reaguar ashpër ndaj një lajmi që theksonte se Shtetet e Bashkuara ende janë të hapur për një shkëmbim të territoreve ndërmjet Kosovës dhe Serbisë.

Mëngjesin e së mërkurës, Grenell, e quajti “lajm të rremë” artikullin e portalit Euobserver i cili u publikua dje.

Euobserver, në këtë artikull shkruante se SHBA po refuzojnë të përjashtojnë një shkëmbim të territoreve midis Kosovës dhe Serbisë – përkundër kundërshtimit të Gjermanisë ndaj kësaj ideje.

Portali evropian citoi një deklaratë të Matthew Palmer, Të Dërguarit të Posaçëm të SHBA për Ballkanin Perëndimor, se “varet nga palët të vendosin parametrat e dialogut”, pasi u pyet për planin e shkëmbimit të territoreve.

“Lajm i rremë. Dhe, ju as që keni më keni kontaktuar për të më pyetur. Unë jam për atë që pajtohen palët – jam i fokusuar në zhvillim ekonomik, jo politikë,” tha Grenell.