Shkodra është kthyer në djep të krimit, Noka: Shkaktari i vetëm, Edi Rama!

Nuk mundet Shqipëria, që ka hapur kapitujt e negociatave dhe është anëtare e NATO-s, të jetë vendi i krimit të organizuar, tha Sekretari i Përgjithshëm i Partisë Demokratike, Falmur Noka, në protestën marshim në qytetin e Shkodrës, me mesazhin për qytetarët që të ngrihen kundër kundër krimit me pushtet që po përpiqet të rrënojë Shkodrën dhe gjithë Shqipërinë.

“Shkodra sot është djepi i krimit të organizuar dhe shkaktari i vetëm është Edi Rama dhe rilindja.
Prandaj jemi këtu për të sensibilizuar qytetarët e Shkodrës dhe të gjithë Shqipërisë kundër këtij krimi.
Nuk mundet Shqipëria, që ka hapur kapitujt e negociatave dhe është anëtare e NATO-s, të jetë vendi i krimit të organizuar, djepi i mafies. Shqipëria duhet të jetë një Shqipëri tjetër, një Shqipëri normale,” tha Flamur Noka, duke shtuar se kjo është dhe arsyeja pse sot janë në Shkodër, për t’i thënë stop.

“Plani është marshim, protestë marshim kundër krimit politik, kundër krimit me fytyrë shtetërore.
Policia nuk ka kohë të merret me ligjin, ka dalë nga binarët e ligjit pasi është një narkopolici.
Në momentin që policia ka në fokus luftën kundër opozitës, kjo është domethënëse.
Policia është njësh me krimin, sikundër i gjithë regjimi është nën kthetrat e krimit,” tha Sekretari i Përgjithshëm i Partisë Demokratike, Falmur Noka, duke dhënë dhe mesazhin për qytetarët e Shkodrës dhe gjithë Shqipërisë:
“Mesazhi është për qytetarët të ngrihen kundër narkoregjimit, kundër krimit me pushtet, kundër këtij regjimi që po përpiqet të rrënojë Shkodrën dhe gjithë Shqipërinë.
Shqiptarët nuk mund të pranojnë një krim që është nën kthetrat e krimit.”

Marshimi i cili nisi në orën 12:00 nga Bashkia Shkodër dhe përshkoi gjithë qytetin me mesazhin e qartë “Qytetnimi asht më i fortë se krimi, po na vrasin, duhet reagim!”, përfundoi aty ku edhe nisi te Bashkia e Krimit që sot drejtohet nga Benet Beci, i zgjedhur nga krimi i organizuar.

Me përfundimin e marshimit, drejtuesi politik i Partisë Demokratike në Shkodër, Luçiano Boçi, tha se Shkodra reagoi fuqishëm dhe qytetaria nuk lejon që Rama të vazhdojë të qeverisë këtë vend me bandat e tij.

“Siç e patë, siç e transmetuat, Shkodra reagoi fuqishëm, Shkodra sot foli me këtë marshim heshtje.
Dhe duhet ta dini se ndonjëherë se ulërima e heshtjes është më shurdhuese se ulërima e zërit se vjen nga brenda Shkodrës, vjen zemra e Shkodrës.
Qytetarët e Shkodrës, të provokuar nga Edi Rama, nuk duan që qyteti i tyre, qyteti i kulturës, i këngës, i gëzimit, të jetë sot qytet i bandave dhe i krimit.

Ngjarja dhe situata në Shkodër dëshmon atë që ne kemi kërkuar dhe e kemi thënë shpesh, domosdoshmëria për qeverinë teknike është reale dhe faktike,” tha drejuesi politik i PD në Shkodër, Luçiano Boçi, me përfundimin e këtij marshimi duke përfunduar:
“Sot Shkodra e kërkon, sot qytetarët e Shqipërisë e kërkojnë. Nuk mundet që Rama të përsërisë pushtetin e tij me krim. Këtë bashki e mori me krim, zgjedhjet politike i mori me krim, por ja ku janë qytetarët, nuk e lejojnë të përsërisë sundimin e tij me anë të krimit.”
Ndryshe, atentati mafioz i të mërkurës së 30 Tetorit në lagjen Dobraç ku mbetën të vrarë tre persona, ishte pika që zgjoi revoltën qytetare në Shkodrën tashmë të sunduar nga krimi, dhe sot dhjetëra mijëra shkodranë iu bashkuan thirrjes së Partisë Demokratike për t’ju bashkuar protestës marshim kundër krimit.