Shkodra nën pushtimin e ujit, Helidon Bushati: Rama po hakmerret politikisht!

Përfaqësuesi politik i Partisë Demokratike për Qarkun Shkodër, Helidon Bushati e konsideron hakmarrje politike të Edi Ramës sjelljen e tij me këtë Qark i cili për më shumë se një muaj është nën pushtimin e ujit dhe qeveria nuk vë dorë.

Sot kur Buna doli nga shtrati ndërsa prurjet janë shtuar dukshëm ashtu si dhe shkarkimet nga tri HEC-et, Helidon Bushati i kërkon Kryeministrit Edi rama që të shpallë menjëherë gjendjen e fatkeqësisë natyrore.

“Kjo qeveri e ka braktisur Shkodrën duke i lënë qytetarët në mëshirë të fatit. Ka më shumë se 1 muaj që zona e nënShkodrës është e përmbytur, sepse qeveria nuk vë dorë. Hakmarrja politike e Edi Ramës po bie sot mbi çdo fëmijë, mbi çdo grua dhe çdo banor të qarkut tonë.

Asnjë ndihmë, asnjë qindarkë, asnjë mbështetje që permbytjet të mos ndodhin ose, të paktën, që uji të largohet shpejt.

Kjo hakmarrje politike e kryeministrit në ikje është diskriminuese dhe për shkodranët. Nuk ka asnjë masë, asnjë ndërhyrje. Heshtje, moskokeçarje, harrese e plotë, ndersa banorët përballen me kërcënimin e jetës dhe mundi i tyre në bujqesi, blegtori dhe frutikulturë është shkatërruar. Ky kryeministër tallet me qytetaret. Babëzia, korrupsioni, mllefi ndaj shkodranëve që nuk e votojnë, e ka verbuar!,” tha Helidon Bushati duke folur për përmasat e kësaj përmbytje:

“Janë më shumë se 4 mijë hektarë toka të permbytura! Alarmi po bie për qytetin, pasi uji po rrethon Shkodrën. Keni parë ndonjë qeveritar? Keni dëgjuar ndonjë vendim për të lehtësuar gjendjen? Asnjë! Në vend të menaxhimit të situatës, qeveria ka ndërmend të vjedhë. Më konkretisht, KESH-i ka braktisur detyrën. Në vend të menaxhojë prurjet e ujit në hidrofenrrale, merret me tendera rrugësh.

Siç shihet në këtë dokument, KESH- i ka prioritet të hedhë asfalt në rrugën e Komankt. Janë plot 2.5 miliard lek që KESH, investon në këtë projekt në shkelje të plotë te ligjit, ndërsa Nënshkodra, noton në uji dhe Shkodra rrezikon të permbytet,” tha Drejtuesi politik i PD në Shkodër duke kërkuar nga Kryeministri të shpallë gjendjen e fatkeqesise natyrore:

“Edi Rama duhet të shpallë menjëherë gjendjen e fatkeqesise natyrore. Ai nuk duhet të thellojë akoma më shumë dhe në kurriz të shkodranëve dështimin e tij 8 vjeçar. Në 25 prill, qytetarët e Shkodrës do ta mbajnë mend këtë ditë të vështirë, kur u braktisën plotësisht nga Edi Rama dhe të deleguarit e tij në Shkodër. Shkodra dhe Shqipëria ka 8 vjet në baltë me Ramën,” tha Drejtuesi i Politik i PD në Shkodër, Helidon Bushati duke përfunduar:

“Ka ardhur koha të ndryshojmë. Më 25 prill Rama do të humbë dhe do të fitojë Shkodra dhe Shqipëria.”