Shkup, Gjykata Penale refuzon ekstradimin e Tomor Morinës në Beograd

Gjykata Penale e Shkupit ka refuzuar ekstradimin e Ish-Pjesëtari të Ushtrisë Çlirimtare të Kosovës, Tomor Morina, në Beograd.

Gjykata ka vlerësuar se për rastin në fjalë nuk janë përmbushur kushtet për ekstradimin e Morinës, ndërsa mendimin, me gjithë dokumentacionin, përfshirë edhe kërkesën serbe, e ka dërguar për shqyrtim të mëtejmë në Gjykatën Supreme, raporton RFE.

“Këshilli Penal pranë Gjykatës Penale në Shkup pasi ka shqyrtuar kërkesën e Ministrisë së Drejtësisë së Maqedonisë së Veriut, si dhe duke marrë për bazë praktikën e vendosur gjyqësore dhe të drejtën ndërkombëtare, ka marrë vendimin se nuk janë përmbushur kushtet e ekstradinmit në Republikën e Serbisë si palë që ka paraqitur kërkesën për ekstradim,” thuhet në njoftimin e Gjykatës.

Gjykatat Penale gjithashtu e ka lënë në fuqi masën e paraburgimit deri në përfundimin e gjithë procedurës.

Morina, ishte arrestuar nga policia maqedonase më 24 korrik, bazuar në një fletarrest të Interpol Serbia.

Ish-pjesëtari i UÇK-së, që aktualisht gjendet në burgun e Shkupit, dyshohet nga ana e autoriteteve të Serbisë se para 20 vjetëve, ka kryer krime kundër popullatës civile në Kosovë.