Shkup, pandemia dëmton zejtarët në Çarshi, kërkojnë ndihmë nga shteti

Kriza me Pandeminë vazhdon të dëmtoj bizneset në Çarshinë e Vjetër të Shkupit. Dhe më shumë pasoja kanë zejtarët të cilët thonë se luftojnë vetëm për të mbijetuar.

“Tek ne zanatet, prej pandemisë, muajin e dytë të vitit të kaluar, mbi nëntëdhjetë për qind për të mos thënë 95%, është ndalur puna. Vetëm në e dimë se si e kalojmë muajin. Shumë është problem. Qeveria nuk na ka ndihmuar asgjë po ua them të drejtën. Asnjë lloj ndihmese ne zanatlinjtë nuk kemi. Unë nuk e di a vetëm restorantet e kafenetë janë në këtë Maqedoni?,” thonë Zejtarët duke këruar që edhe Qeveria të fillojë t’i lirojë masat, që të paktën të mund të kenë punë gjatë sezonit të verës.

“Sipas situatës epidemiologjike, gradualisht duhet të bëjnë lëshime, sepse paratë të cilat duhet të harxhohen këtu, sidomos ato që i sjellë mërgata, duhet Qeveria ta gjejë mundësinë si ti harxhojnë këtu, e jo ti çojnë në shtetet fqinje.”

Luftë për mbijetesë bëjnë edhe bizneset tjera të cilat veprojnë në Çarshi. Shpresojnë se lejimi i ahengjeve dhe darsmave, ardhja e mërgimtarëve dhe turistëve do t’i ndihmojë të mbijetojnë edhe këtë vit.

“Me 70% ka rënë puna, me ata 30% ne e i mbajmë punëtorët, e mbajmë dyqanin, ato që mbesim i marrim vetë. Të na lirojnë, të punojë populli siç duhet, të vijnë turistë, siç kishim turistë përpara ajo na ndihmon… Dasmat më shumë na kanë frenuar, sepse ne të gjithë punën e kemi me dasma, nëse nuk ka dasma nuk ka punë,” thotë njëri prej pronarëve të biznesit.

“Ndikimi është shumë i madh, siç e shihni njerëz nuk ka, edhe pse dy javë u bënë nga muaji i shenjtë i Ramazanit, lëvizje nuk ka, as njerëz as biznesi. Ne mendojmë që nja një javë para Bajramit, do të ketë lëvizje sepse njerëzit kanë nevojë të blejnë tesha dhe ushqime të tjera.”

Ndryshe, gjatë 24 orëve të fundit, nga 572 teste në Maqedoni janë regjistruar 62 raste të reja me COVID-19, 32 prej të cilëve vetëm në Shkup. Ndërkohë nga Instituti i Shëndetit Publik raportohet se janë shëruar 398 pacientë të prekur me koronavirus. Ndërsa betejën me COVID-19, raporton Alsat, e kanë humbur 25 pacientë. Në këtë situatë epidemiologjike Qeveria e Maqedonisë nuk ka konfirmuar akoma nëse do të lejojë organizimin e dasmave dhe ahengjeve gjatë kësaj vere që ngelet dhe shpresa e vetme për rimëkëmbje.