Shkupjani që gjysmë shekulli prodhon këpucë artizanale
Prodhuesi 57-vjeçar i këpucëve nga Shkupi, Kenan Bajrami, me këpucët që sot i prodhon me dorë, i reziston kohës.
Duke folur për Agjencinë turke të lajmeve Anadolu, Bajrami tregon se si e ka filluar këtë zanat dhe planet e tij për të ardhmen.
Ai tha se me këtë profesion është njoftuar kur ai ka qenë 13 vjeç, si çirak në Çarshinë e Vjetër të Shkupit.
“Si fëmijë duke e dashur këtë punë kam punuar një kohë të gjatë me këtë punë, derisa shkova në ushtri në kohën e Jugosllavisë edhe pasi u ktheva prej ushtrisë vazhdova me të njëjtën punë,” tha Bajrami duke treguar se gradualisht duke u bërë mjeshtër e ka hapur dyqanin e tij.
Në fillim, ai shpjegon se, pasi e ka hapur punëtorin e tij, kanë pasur shumë kërkesa, bashkë me kërkesat edhe kanë pasur 15 punëtorë, por tani kanë mbetur vetëm 3 persona.
Kur më parë kanë prodhuar 60 palë këpucë në ditë, ai thotë se ky numër sot ka rënë në 6 palë në ditë.
Shkupjani Bajrami afro gjysmë shekulli prodhon këpucë artizanale https://t.co/C8svVvr5UO pic.twitter.com/5XGvPguphU
— Anadolu Shqip (@aa_albanian) November 30, 2024
Materialet i importon prej Turqisë
Me fëmijët e tij të cilët studiojnë dega të tilla si shkenca kompjuterike, menaxhimi i biznesit dhe grafik dizajn, Bajrami tregon se tashmë kanë bërë një “atak” për hapjen e dyqaneve dhe shitjen online.
“Shitja online, ne jemi me kohë (të vjetër) dhe nuk i kuptojmë bash mirë, ne i kuptojmë reklamat e viteve tona se si duhet me i bë reklamë këpucën, si duhet të jetë brendi. Tash është kjo krejt një mënyrë e re e punës çka ne i kemi lënë fëmijët tonë”, tha Bajrami.
Më tej duke treguar se prodhimet e tij kryesisht janë të lëkurës, Bajrami bëri të ditur se duke filluar nga lëkura e deri te gjithë komponentët e këpucëve i importon prej Turqisë.
Bajrami tha se përveç këpucëve të burrave prodhojnë edhe të grave dhe fëmijëve.
Duke folur për mundësinë e eksportit të produkteve të tyre, ai për Agjencinë turke të lajmeve Anadolu thotë se janë të kufizuar me Maqedoninë e Veriut:
“Ne jemi detyruar të kufizohemi vetëm me Maqedoninë e Veriut edhe ajo kryesisht nëpër qytetet e mëdha të Maqedonisë së Veriut, Shkupi, Manastiri, Ohri, Struga, Gostivari, Tetova edhe një fshat Llabunishta”.
