Shoqata e Bashkive të Shqipërisë, 30 Qershori në Gjykatë Kushtetuese

Pas depozitimit të kërkesës në Gjykatën Kushtetuese, Kryetarja e Shoqatës së Bashkive të Shqipërisë, Voltana Ademi, tha se kërkojnë konstatimin si antikushtetues të procesit të 30 Qershorit si dhe atë të regjistrimit të partisë Bindja Demokratike.

“Jemi këtu duke iu referuar asaj që është e drejtë kushtetuese dhe publike në interes të qytetarëve. Dekreti duhet të merrej në konsideratë, shpresoj që në momentin e parë që të jetë në punë të nis gjykimin e një cështje me rëndësi.Ne shpresojmë që Rama të mos pengojë ngritjen e gjykatës dhe të marrë sa më shpejt cështjen në gjykim.”

E pyetur mbi veprimet që do të ndjekin, për lirimin ose jo të zyrave ndaj të zgjedhurve të rinj vendor nga procesi i 30 Qershorit, Kryetarja e Shoqatës së Bashkive të Shqipërisë, Voltana Ademi, sqaroi:

“Ne po veprojmë në mënyrë institucionale. Gjithë kryetarët e bashkive i janë drejtuar institucioneve të drejtësisë, një e drejtë e jonë, për të ndërtuar demokracinë mbi bazën e shtetit. Apeloj që çështjet të hetohen dhe gjykohen në mënyrë të pavarur duke mos iu nënshtruar presionit politik. Kemi gjykata që kanë vepruar në mënyra të ndryshme.”