Shoqërohen në polici, Ish-deputeti i Elbasanit: Hakmarrja meskine…

Shoqërimet në polici kanë vijuar ndonëse kryeministri Edi Rama i dha fund vizitës në Elbasan ku u prit me protesa dhe bllokim të rrugës, madje policia nuk ka kursyer as Ish-deputetin e PD-së dhe profesorin e nderuar të këtij qyteti, Luçiano Boçi.

Pasi dha dëshminë në polici, Ish-Deputeti u lirua dhe në një prononcim për media duke dënuar dhunën e policisë ndaj opozitës të cilën e cilësoi si hakmarrje meskine e Edi Ramës, tha se veprimi i sotëm i policisë tregon se ajo është në shërbim të Ramës:

“Veprimi i sotëm tregon që policia është vënë krejtësisht në shërbim të Edi Ramës, pasi sot është ndaluar pjesa e zinxhirit politik të Partisë Demokratike të qarkut të Elbasanit. Janë gati 15 të ndaluar, të proceduar penalisht për  miting gjoja të paligjshëm, por që qytetarët janë në të drejtën e tyre për të protestuar ndaj kryeministrit ndaj kësaj qeverie në bazë të Kushtetutës dhe të drejtës që e njeh ligji. Tek e fundit protesta nuk ka qenë e dhunëshme nga protestuesit, dhuna ishte nga ana e policisë.”

Edi Rama mendon se do ta burgos opozitën, tha Boçi, por këto janë grahmat e fundit të pushtetit të krimit

“Kjo është hakmarrja meskine e Edi Ramës për shkak se qytetarët e Elbasanit e braktisën takimin e tyre kërkuan ndalimin e ardhjes së tij në Elbasan për të gjitha ato arsye të cilat tashmë i dinë të gjithë qytetarët. Në fakt këta kërkojnë tyë burgosin opozitën, por opozita s’mund të burgoset. Opozita nuk është vetëm Partia Demokratike, opozita janë të gjithë qytetarët.”

Në fund, Ish-Deputeti Luçiano Boçi tha se protesta është transmetuar nga mediat dhe aty shihet qartë se kush përdori dhunë, protestuesit paqësor apo policia e cila ishte e armatosur deri në dhëmbë me armatim të rëndë, kallashnikov dhe pistoleta. Dhe përkundër presionit dhe dhunës policore, Kryeministri ka marrë përgjigjen e merituar dhe nervozizmi që ai shprehë tregon se ditët e Edi Ramës janë të numëruara.