Shpallet koncesioni për TEC Vlorën, vlera 58.7 milionë euro, afati 20 vjet

Koncesioni për Termocentralin e Vlorës është shpallur këtë fillimvit nga Ministria e Infrastrukturës dhe Energjisë me një vlerë 58.7 milionë euro sipas projektit të fizibilitetit.

Në dokumentet e saj Ministra sqaron se kjo është vlera e investimit të parashikuar për koncesionin e formes ROOT që nënkupton rehabilitim, mirëmbajtje, zotërim dhe në fund transferim. Afati i koncesionit është përcaktuar 20 vjet. 

“Ministria e Infrastrukturës dhe Energjisë ka vendosur të implementojë projektin e rehabilitimit dhe të operimit të Termocentralit të Vlorës, përfshirë mundësisht një degëzim të tubacionit të gazit Fier-Vlorë. Përzgjedhja e Ofertuesit Fitues do të bëhet bazuar në një proçedurë të hapur konkurrimi, sipas kritereve specifike të kualifikimit dhe vlerësimit që ndodhen në këtë dokument. Kohëzgjatja e kontratës konçesionare/PPP është 20 vjet, duke filluar nga momenti i rehabilitimit, operimit të TEC-it dhe pasi të jetë siguruar furnizimi me gaz i TEC-it të Vlorës” thuhet në dokumente. 

Lidhur me ofertuesit duket se pjesën më të madhe të pikëve në vlerësim do ta ketë kriteri teknik me 40 pikë, kriteri financiar me 30 pikë, përvoja e ofertuesit në 7 vitet e fundit me 23 pikë dhe koha për vënien në funksion të TEC-it 7 pikë. 

Ofertat sipas afateve të përcaktuara në shpalljen e procedurës duhet të praqiten brenda datës 28 shkurt. 

Termocentrali i Vlorës është një histori aspak e suksesshme e një investimi që i ka kushtuar shtetit shqiptar 130 milione dollarë. 

Ai u ndërtua me mbështetjen e Bankës Botërore si një vepër që do ti shërbente diversifikimit të burimeve dhe do rriste sigurinë energjetike por që deri më sot nuk ka prodhuar asnjëhere energji për dy arsye : e para kostoja shumë e lartë dhe e dyta një problem me sistemin e ftohjes që ka detyruar shtetin shqiptar të endet arbitrazheve./Monitor/