“Shpërbërja s’u votua”, Gjukanoviç: Parlamenti i Malit Zi nuk po ushtron kompetencat kushtetuese

“Parlamenti nuk e ka për detyrë ta votoj propozimin, parlamenti mori propozimin dhe mori përgjegjësinë politike që mos ta votoj,” tha Presidenti i Malit Zi, Milo Gjukanoviç, pasi parlamenti me 39 vota për dhe 41 kundër, propozimin e Presidentit për shpërbërjen e parlamentit nuk e futi as në rendin e ditës.

“Parlamenti po tregon se nuk po ushtron kompetencat e veta kushtetuese. Kompetenca e parë është të zgjedhë qeverinë. Me shumicë, Parlamenti votoi mocionin e mosbesimit dhe pas këtij votimi shumica parlamentare kishte mundësinë që në afat prej 30 ditësh të sjellë dëshmi se ka propozimin për të mandatuar një tjetër person i cili do të bëjë përpjekje që të formojë qeverinë,“ tha Gjukanoviç duke treguar se qëllimi është i qartë, paralizimi institucional i Malit Zi.

“Qëllimi i kundërshtarëve politik të Malit Zi evropian dhe të pavarur është i qartë, të tregoj se Mali i Zi institucionalisht është jofunskional. Për këtë arsye asnjëri prej 18 kandidatëve për gjyqtarë të Gjykatës Kushtetuese nuk ishte mjaftueshëm i mirë që të zgjidhet, sepse qëllimi ishte që ta bëjnë Gjykatën Kushtetuese jofunksionale.”

Gjukanoviç sqaroi se me bllokimin e Gjykatës Kushtetuese, nuk mund të mbahen zgjedhjet parlamentare.

“A duhet të interpretohet edhe më tej qëllimi se Mali i Zi duhet të bëhet institucionalisht jofunskional dhe i paaftë në mënyrë që të dëshmohet teza e nacionalizmit serbomadh se Mali i Zi nuk duhet të ekzistoj, sepse institucionalisht është jofunksional, dhe se duhet të kthehet në kuadër të Serbisë,” tha Presidenti i Malit të Zi duke përfunduar:

“Në këtë mënyrë, duhet plotësuar ëndërrat dhe dëshirat shekullore të Rusisë imperialiste që ta ketë portin e saj në Adriatik, dhe Serbia e Madhe të konstituohet në kufinjtë e ri!

Sot është e qartë se ata kanë zbatuesin e punëve në Mal të Zi, ai është Kryeministri. Kemi përgjegjësinë politike në parlament, dhe parlamenti duhet të mendoj se si të dalë nga kjo rrugë qorre.”

I pyetur se cilët janë mekanizmat dhe a mund të bëjë ndonjë hap, Gjukanoviç sqaroi se me kujdes po interpretohet Kushtetuta me ekspertë vendor dhe të huaj të drejtës kushtetuese ndonëse këtu Kushtetuta nuk është precize.

“Nuk kam vërjetje tek ata që e hartuan Kushtetutën sepse ata kurrë nuk mund ta mendonin se ku mund t’ju çoj një qeveri kaq e papërgjegjshme,” tha Gjukanoviç duke shtuar se do të bëjë përpjekje për të gjetur një përgjigje të duhur edhe për ndonjë iniciativë të Presidentit, i bindur se nyja gordiane mund të ndërpritet vetëm me zgjedhje të parakohshme.

Ndryshe, më 30 gusht 2020, liderët e tre koalicioneve i dërguan Presidentit Milo Gjukanoviç propozimin për mandatimin e Dritan Abazoviçit për Kryeministër me 41 firma kur ato nuk ishin të domosdoshme sepse në konsultime ishin 46 deputetë dhe kishte vullnet për zgjedhjen e qeverisë së re.

Pas rënies së qeverisë së Abazoviçit u propozua Miodrag Lekiç por liderët e koalicionit të ri refuzuan të shkojnë në konsultime me presidentin ndërsa 41 firmat e domsdoshme thanë se do ti dërgojnë në afatin ligjor.

Afati skadoi, Presidenti Milo Gjukanoviç nuk mori firmat me propozimin për të mandatuar liderin e Demosit, Miodrag Lekiç, për formimin e qeverisë së re të Malit Zi.

Në këtë situatë, Presidenti i Malit Zi, Milo Gjukanoviç, duke konstatuar se nuk ka shumicë parlamentare për zgjedhjen e qeverisë së re, i propozoi Parlamentit shpërbërjen e tij, për të hapur rrugën zgjedhjeve të reja parlamentare.