Shpërdorim detyre dhe falsifikim, Gjykata penale e Tiranës: Pezullohen Duka dhe Shulku

Gjykata e Tiranës pezullon nga detyra kreun e FSHF Armand Dukën dhe Sekretarin e Përgjithshëm të Federatës Shqiptare rë Futbollit, Ilir Shulku, ndërsa po hetohen me akuzën e shpërdorimit të detyrës dhe falsifikimit. Vendimi u mor nga gjyqtari Artan Gjermeni.

Pak ditë më parë, Gjykata e Tiranës ka pranuar kërkesën për pezullimin e efekteve juridike të vendimit nr. 1, datë 10.01.2022, të Komisionit të Verifikimit të FSHF-së, si dhe të çdo veprimi apo akti tjetër të dalë në zbatim të këtij vendimi, për realizimin e mbledhjes së Asamblesë së Përgjithshme të Zakonshme Zgjedhore të FSHF-së të datës 02.03.2022, deri në zgjidhjen e konfliktit me një vendim të formës së prerë.

Gjithashtu, Gjykata vendos që të pezullojë efektet juridike të Vendimit të datës 21.01.2022, të Komitetit Ekzekutiv të FSHF-së, si dhe të çdo veprimi apo akti tjetër të dalë në zbatim të këtij vendimi.

Vendimi :

1.Pranimin e kërkesës.

-Caktimin si masë sigurimi ndalues ndaj personit nën hetim Ardian Haçi,atë të “Pezullimi i ushtrimit të një detyre a shërbimi publik” të parashikuar nga neni 242 i K.Pr.Penale.

2.Pranimin e kërkesës

-Caktimin si masë sigurimi ndalues ndaj personit nën hetim Ilir Shulku, atë të “Pezullimi i ushtrimit të një detyre a shërbimi publik” të parashikuar nga neni 242 i K.Pr.Penale.

3.Pranimin e kërkesës.

-Caktimin si masë sigurimi ndalues ndaj personit nën hetim Armando Duka, atë të “Pezullimi i ushtrimit të një detyre a shërbimi publik” të parashikuar nga neni 242 i K.Pr.Penale.

4.Rrëzimin e kërkesës për caktimin si masë sigurimi ndaluese ndaj personit nën hetim Koço Kokëdhima,atë të “Pezullimi i ushtrimit të një detyre a shërbimi publik” të parashikuar nga neni 242 i K.Pr.Penale.

5.Vendimi t’i njoftohet Prokurorisë së Rrethit Gjyqësor Tiranë.

6.Vendimi t’i njoftohet personave nën hetim Ardian Afrim Haçi, Ilir Ismail Shulku, Armando Enver  Duka dhe  Koço Theodhori Kokëdhima.

7.Kundër këtij vendimi për caktimin e masës së sigurimit lejohet ankim brënda 5 (pesë) ditëve  duke filluar ky afat nga njoftimi i vendimit të Gjykatës.

Ndjekje penale

Ndryshe nga pesë vendimet e mëparshme të gjykatave, të cilat kanë qenë të karakterit civil, vendimi i sotëm është penal për Armand Dukën , ç’ka do të thotë se kreu i FSHF-së, rrezikon të ndiqet penalisht.

Në argumentet e gjyqtarit Artan Gjermeni çmohet se në lidhje me akuzën e ngritur nga prokuroria për kreu e FSHF, Armand Duka, bazuar në provat e administruara, krijohet dyshimi i arsyeshëm personi nën hetim e ka kryer faktin penal për të cilën hetohet.

Gjykata e vlerëson si të bazuar në ligj kërkesën e Prokurorisë, ndërsa thekson se caktimi i masës ndaluese sipas kësaj dispozite zbatohet ndaj personit nën hetim/të pandehurit i cili është në një detyrë apo funksion publik gjatë kohës që ai është në një procedim penal.

Në çështjen konkrete, Gjykata vlerëson se marrja e një mase të tillë është e nevojshme pasi ekziston koneksiteti i kërkuar ndërmjet faktit penal dhe detyrës që ushtron personi nën hetim.

“Vepra penale për të cilën hetohet personi nën hetim dyshohet të jetë kryer për shkak të pozitës së veçantë që ka personi nën hetim, me detyrë President i FSHF-së, ku nëpërmjet veprimeve apo mosveprimeve ka mundësuar apo lejuar ardhjen e pasojave të paligjshme që vijnë në kundërshtim me përmbushjen e rregullt të detyrës. Personi nën hetim rezulton të ketë qenë në dijeni të paligjshmërive të sipërcituara dhe nuk ka kryer asnjë veprim me qëllim parandalimin e situatës së paligjshme të krijuar (dyshuar për këtë fazë të hetimit). Pozita e tij dhe detyra kërkon që ai të marrë masa për parandalimin e situatave të paligjshme, dhe për këtë shkak një masë e tillë do t’i shërbente hetimit por edhe do të shërbejë si shkak për të parandaluar çdo dyshim për mundësinë për të ndërhyrë në vijueshmërinë normale të provave/hetimit.

Në caktimin e masës ndaluese parashikuar nga neni 242 i KPP, gjykata ka si qëllim ndërprerjen e aktivitetit të kundërligjshëm të tij në rrethanat konkrete të çështjes, pasi ushtrimi i detyrës së të dyshuarit ka lidhje me veprimet ose mosveprimet e tij. Në këtë kontekst ka një rrezik real dhe nevojë për marrjen e një mase procedurale për të shmangur mundësinë që ka personi nën hetim, te vazhdoje aktivitetin e tij, e cila ka lidhje te drejtpërdrejte me veprimin e tij te kundërligjshëm.

Nga ana tjetër plotësohet edhe kushti formal i parashikuar nga neni 241 i KPP, lidhur me kushtet e zbatimit të masave ndaluese, i cili parashikon se, masat ndaluese mund të zbatohen vetëm kur procedohet përvepra penale, për të cilat ligji cakton dënim me burgim më të lartë nëmaksimum se një vit. Vepra penale për të cilën dyshohet personi nën hetim parashikon dënim deri në shtatë vjet burgim.

Në kushte kur, sporti me ligj është parashikuar si një interes publik që tejkalon interesat private të mënyrës së organzimit të tyre në formën e OJF-së, konkludohet se edhe drejtuesit e tyre ushtrojnë një detyrë apo shërbim që i përket sferës publike.

Për sa më sipër, ndaj personit nën hetim duhet të caktohet masa e sigurimit “Pezullimi i ushtrimit të një detyre a shërbimi publik”, parashikuar nga neni 242 i Kodit të Procedurës Penale.

Çmohet nga gjykata që ushtrimi i detyrës për personin nën hetim Armando Duka duhet të ndalohet plotësisht duke përjashtuar veprimet administrative për kryerje pagesash në favor të personave fizik ose juridik (paga, shlyerje kontratash e të tjera të kësaj natyre)” thuhet në argumentin e Gjykatës për kreun e FSHF./BW/