Shpërthen koronavirusi, Melbourne izolohet sërish

Qyteti australian, Melbourne do të mbyllë fabrikat dhe bizneset jo të domosdoshme, teksa autoritetet po përballen me shpërthime të reja të koronavirusit. Në mesin e masave të kufizimit përfshihet edhe ora policore në qytetin me pesë milionë banorë, pasi izolimi fillestar nuk ka arritur të ndalë virusin e raportuar fillimisht në Kinë, në fund të vitit të kaluar.

Rreth një milion punëtorë do të detyrohen që shumë shpejt të qëndrojnë nëpër shtëpitë e tyre.

Për këtë arsye autoritetet janë shprehur se do të paguajnë punëtorët që janë detyruar të izolohen për 14 ditë, nëse paraprakisht kanë shfrytëzuar ditët e pushimit mjekësor.

Kryeministri i Australisë, Scott Morrison, tha se pagesa prej 1.500 dollarëve australianë do të ndahet për ata që nuk kanë qasje në përfitime tjera dhe mund të zbatohet disa herë.

Autoritetet australiane kanë vlerësuar se masat e reja do të zvogëlojnë shkallën e përhapjes së koronavirusit.

Deri para pak kohësh, Australia mbahej si e sukseshme për dallim nga shumica e shteteve tjera në luftimin e sëmundjes COVID-19, mirëpo, raporton RFE, një shpërthim në Victoria ka çuar kombin në pikën më të rëndë deri më tani.

Më shumë se gjysma e totalit të numrit të të infektuarve, 18,300, janë regjistruar vetëm muajin e kaluar në Victoria.

Në territorin australian deri më tani është raportuar për 215 vdekje të lidhura me COVID-19.