Shpërthim i fuqishëm në Gjermani, një i vdekur dhe 4 të zhdukur

Një person ka vdekur dhe katër të tjerë janë zhdukur, si pasojë e një shpërthimi të fuqishëm në një park industrial në qytetin gjerman Leverkuzen.

“Ne jemi thellësisht të prekur nga ky aksident tragjik dhe vdekja e një punëtori,” tha Kompania menaxhuese Currenta duke shtuar se ekipet e shpëtimit do të vazhdojnë punën me të gjitha kapacitetet për të gjetur punëtorët e zhdukur.

Shpërthimi, raporton RFE, ka nxitur alarm për rrezik ekstrem, si dhe ka shtyrë zyrtarët që t’iu bëjnë thirrje banorëve që të mbyllen brenda dhe të mbyllin dritaret.

Chempark ka brenda vetes kompani të mëdha kimike, përfshirë, Bayer dhe Lanxess. Currenta tha se shpërthimi i 27 korrikut ka ndodhur në një zonë ku digjen mbeturinat. Sipas saj, zjarri tashmë është shuar por ende askush nuk e di çfarë e ka shkaktuar shpërthimin.

Në disa pamje në rrjetet sociale është parë tym i madh duke dalë nga zona kimike.

Policia në qytetin e afërt, Këln, tha përmes rrjetit social Twitter se është duke mbyllur disa autostrada në zonën në Leverkuzen, për shkak të “dëmit të madh”.

Banorët janë shprehur se zhurma është dëgjuar nga distanca dhe se disa dritare kanë kërcitur nga shpërthimi i fuqishëm.