Shpërthim i fuqishëm në Mal të Zi, dy të vdekur, tre të plagosur rëndë

Pas një shpërthimi të fuqishëm mëngjesin e sotëm në qytetin e Cetinjes në Mal të Zi, dy persona kanë mbetur të vdekur dhe tre janë janë plagosur rëndë.

Mësohet se dy të vdekurit janë Petar Kalugjeroviç dhe Dragan Roganoviç, të njohur si pjesëtarë të bandës më të rrezikshme kriminale në Mal të Zi dhe Serbi, “Shkalari”, ndërsa njëri prej të plagosurëve avokati i njohur i interesave të kësaj bande, Tanasije Jovanoviç.

Televizioni publik i Malit Zi, raporton se shpërthimi i fuqishëm i cili ndodhi në orën 9:00 në Qendrën Sportive në Cetinje, ku u thyen dhe të gjitha xhamat, ka shqetësuar gjithë qytetin ndërkohë janë mbyllur të gjitha rrugët që të çojnë në këtë Qendër.  

Ndërkohë Drejtoria e Policisë njofton se po bëhet këqyrja e vendit të ngjarjes me qëllim të zbardhjes së ngjarjes.

“Me qëllim të përcaktimit të të gjitha rrethanave dhe fakteve, si dhe zbardhjen e kësaj ngjarje, zyrtarët e Drejtorisë së Policisë në koordinim me Prokurorinë e Lartë në Podgoricë, po marrin masa intensive të hetimit, për të cilat do të njoftohet opinioni publik në kohën e duhur,” thekson policia përmes komunikatës. 

Hetimet vazhdojnë, në vendin e ngjarjes janë ekipet e Shërbimit të kërkim shpëtimit dhe Urgjencës.