Shpërthim me tritol në makinë, i plagosuri punonjës i Tatimeve

Një punonjës i Tatimeve ka mbetur i plagosur pas shpërthimit me tritol në një automjet në Shkodër.

I plagosuri është identifikuar si Enea Busukja dhe sipas burimeve ndodhet jashtë rrezikut për jetën.

“Si pasojë është dëmtuar shtetasi Enea Busukja, 38 vjeç, i cili është dërguar në spital dhe aktualisht është jashtë rrezikut për jetën”, njoftoi policia.

Ndryshe, ngjarja ka ndodhur paraditen e sotme në lagjen “Ndoc Mazi”, ku mjeti raportohet se ka qenë i parkuar.

Sipas policisë, shpërthimi ka ndodhur në momentin që 38-vjeçari i dëmtuar ka ndezur makinën e tij.

Njoftimi:

Shkodër/Informacion paraprak

Rreth orës 11:35, në lagjen “Ndoc Mazi”, në momentin që shtetasi Enea Busukja ka ndezur automjetin e tij, ka shpërthyer një sasi lënde plasëse në automjet.

Si pasojë është dëmtuar shtetasi Enea Busukja 38 vjeç, i cili është dërguar në spital dhe aktualisht është jashtë rrezikut për jetën.

Grupi hetimor, në drejtimin e Prokurorisë, po kryen veprimet për zbardhjen e rrethanave të rastit, identifikimin dhe kapjen e autorit/ëve.