Shpërthim misterioz, vritet Komandanti rus që udhëhoqi sulmet në Mariupol
Ish-Komandanti rus Zaur Gurtsiev, i njohur për sulmet ajrore në Mariupol ku mbetën të vrarë 8.000 njerëz, është vrarë në një shpërthim në qytetin jugor rus të Stavropolit, tha Komiteti Hetues i Rusisë.
Gurtsiev, 34 vjeç, i cili u dekorua disa herë për rolin e tij në rrethimin rus të qytetit port ukrainas, u vra së bashku me një burrë tjetër në një shpërthim që dyshohet se ishte rezultat i një sulmi kamikaz.
Komiteti Hetues tha se trupat e dy burrave me plagë të shumta u gjetën jashtë një ndërtese të lartë. Hetimet kanë nisur për vrasje dhe mbajtje pa leje të lëndëve plasëse. Një video e postuar në rrjetet sociale tregon dy burrat pranë makinave të parkuara dhe një stoli. Në një moment, një dritë e shndritshme ndizet dhe pamjet shkëputen.
Një seri sulmesh
Megjithëse shkaku i shpërthimit nuk është konfirmuar zyrtarisht, autoritetet ruse nuk e kanë përjashtuar mundësinë e përfshirjes së Ukrainës. Mediat lokale spekulojnë se ishte një sulm në të cilin mund të jetë përdorur një granatë dore. Gurtsiyev supozohej të emërohej në një pozicion në administratën rajonale të Stavropolit. Guvernatori Vladimir Vladimirov dhe zyrtarë të tjerë shprehën ngushëllimet e tyre për familjen e tij.
Vdekja e tij vjen pas një sërë atentatesh të zyrtarëve të lartë ushtarakë rusë. Në dhjetor, kreu i Departamentit Rus për Armët Biologjike dhe Kimike, gjenerallejtënant Igor Kirillov, vdiq në një shpërthim në Moskë, së bashku me zëvendësin e tij. Muajin e kaluar në Moskë, një mjet shpërthyes vrau gjeneral-lejtnant Jaroslav Moskalik.
E joshën përmes një aplikacioni homoseksual?
Kanali rus Telegram VChK-OGPU, duke cituar burimet e tij, publikoi detaje në lidhje me vdekjen e Zaur Gurtsiyev. Sipas raportit të tyre, Gurtsiyev kontaktoi me një burrë të quajtur Nikita Penkov përmes një aplikacioni për takime homoseksuale. Hetuesit thuhet se gjetën mesazhe eksplicite dhe foto nudo mes të dyve.
Gurtsiyev, i cili mbante postin e nënkryetarit të bashkisë, e ftoi Penkovin të takohej disa herë, por takimet e mëparshme u anuluan për shkak të udhëtimeve të biznesit të Gurtsiyev – deri në natën e shpërthimit. Ata ranë dakord paraprakisht për vendin e takimit. Teksa janë afruar me njëri-tjetrin ka ndodhur një shpërthim.
Gjetjet paraprake sugjerojnë se një mjet shpërthyes i improvizuar ishte në çantën e Penkov. Ai dyshohet se përmbante fishekë metalikë, të ngjashëm me ato të përdorura në pushkët me ajër, për të rritur efektin.
VChK-OGPU pretendon se Penkov mund të jetë rekrutuar nga një grup i panjohur për të mbledhur materiale komprometuese për Gurtsiyev dhe se ai dyshohet se ishte pajisur me një mjet “të pajisur posaçërisht” të transmetimit të videos. Në atë pajisje, siç thonë ata, ishte futur një mjet shpërthyes.
