Shpërthim në një fabrikë ushtarake në Serbi, disa të plagosur

Disa persona kanë mbetur të plagosur nga shpërthimi që ka ndodhur mëngjesin e sotëm në Repartin e prodhimit të detonatorëve të Fabrikës ushtarake Krushik të Valevës, në perëndim të Serbisë.

Sipas informacioneve jozyrtare nga Spitali i Valjevës, shtatë persona kanë mbetur të lënduar dhe të gjithë kanë pësuar lëndime të lehta fizike, raportojnë mediat serbe.

Shpërthimi ka ndodhur në orën 07:30 dhe ende nuk dihet shkaku.

Ndryshe, ky është një tjetër në serinë e incidenteve në këtë fabrikë. I fundit ka ndodhur më 3 gusht 2024, kur sipas njoftimit të menaxhmentit, tre persona kanë mbetur të plagosur lehtë teksa punonin me detonator në laboratorin e minave.

Në atë kohë, shumë media njoftuan se pas shpërthimit të minës mbetën të lënduar shtatë punëtorë, por nga fabrika deklaruan se ngjarja “nuk ka pasur përmasa më të gjera” dhe se janë shmangur dëme më të mëdha njerëzore dhe materiale.

Ky ishte i ashtuquajturi “aksident” i pestë në Krushik në dy vitet e fundit.

Duke pasur parasysh praktikën e deritanishme, nuk është e sigurt nëse opinioni publik do ta zbulojë shkakun e shpërthimit të sotëm ku mbetën të plagosur shtatë persona, dhe cili është numri i saktë i atyre që kanë pësuar me rastin e këtij shpërthimi.