Shpërthim tek zyrat e Postës së Kosovës në Zveçan

Një shpërthim ka ndodhur pas mesnate te zyrat e reja të Postës së Kosovës në Zveçan. Lajmin e ka konfirmuar policia duke saktësuar se fjala është për një granatë dore të shpërthyer brenda objektit të Postës ndërsa një tjetër është shpërthyer në mënyrë të kontrolluar nga policia.

Zv/Drejtori i Policisë për Rajonin e Mitrovicës, Veton Elshani, tha se rasti ka ndodhur rreth orës 00:30, duke shkaktuar dëme materiale.

“Persona të lënduar nuk ka. Janë shkaktuar dëme materiale, thyerje xhamash por nuk ka të lënduar,” tha Veton Elshani duke shtuar se njësitet përkatëse të policisë kanë dalë në vendngjarje dhe po zhvillojnë hetimet për rastin.

Ndryshe, Dega e Postës së Kosovës në Zveçan u hap më 27 mars, komunë kjo në veri. Më parë në këtë objekt ndodhej Dega e Postës së Serbisë, që u mbyll në maj të vitit të kaluar ndërkohë Policia e Kosovës vazhdon luftën me bandat kriminale të Vuçiçit që vazhdojnë dhe luftojnë institucionet kosovare në këtë pjesë të Kosovës, me sulme terroriste nga bombat e dorës deri në tritol.