Shpërthimi tragjik në Lushnje, Inspektorati Shtetëror në vendngjarje
Një ditë pas tragjedisë në Lushnjë ku mbetën të vdekur 2 persona dhe shtatë u plagosën, mes tyre dhe deputeti i PS-së, Bujar Çela, Inspektoriati shtetëror ka shkuar në vendngjarje.
Sot në vendgjarje ndodhen gjithashtu Prokurorja e Fierit, inxhinierë të OSHEE, njësia anti-eksploziv dhe policia e Lushnjës.
Mësohet se katër plagosurit në spitalin e Lushnjës, janë jashtë rrezikut për jetën.
Si ndodhi shpërthimi
Teksa një vinç, ku ndodheshin dy viktimat Roland dhe Elidon Hoxha, baba e bir, po ngrinte një bombol oksigjeni që do të përdorej në lartësi për të kryer saldime, maja e mjetit të hekurt ka hasur në telin përcjellës të tensionit të lartë e për pasojë bombola ka shpërthyer.
Babai ka ndërruar jetë në vinç, ndërsa i biri u transportua me ambulancë në drejtim të Tiranës, por fatkeqësisht rrugës ka ndërruar jetë!
Janë plagosur edhe 7 persona të tjerë, mes të cilëve edhe deputetit i Partisë Socialiste, Bujar Çela, i cili iu nënshtrua ndërhyrjeve mbrëmjen e djeshme në Spitalin e Traumës.
Policia e Lushnjës bëri me dije se kishte ndodhur një shpërthim i fuqishëm në një kompleks magazinash, zonë industriale në Lushnjë, që iu mori jetën babë e bir.
Shpërthim ndodhi rreth orës 15:30 në vendin e quajtur “Rreth-rrotullimi i Plastmasit”, në një kapanon në ndërtim në qytet dhe shkak u bë një incident, teksa një vinç që po punonte në magazinë preku telat e tensionit të lartë.
“Dyshohet se gjatë punës, një vinçier duke drejtuar një vinç, aksidentalisht ka prekur linjën e tensionit të lartë dhe për rrjedhojë ka ndodhur një shpërthim i fuqishëm”, – informoi policia e Lushnjës pak minuta pas ngjarjes.
Policia përgjatë pasdites së djeshme saktësoi se mbetet i paqartë shkaku i këtij incidenti që përfundoi në tragjedi për familjen Hoxha, por përmasat mund të ishin më të rënda, nisur nga forca e shpërthimit. Në videon e shpërthimit pas kontaktit të vinçit shfaqen objekte me presion të lartë në flakë, ku dyshohet se mund të ketë pasur bombola oksigjeni në këto ambiente pune që kanë nxitur shpërthimin e fuqishëm.
