Shpëtoi jetën e dy fëmijëve në Velipojë, shuhet heroi Arjan Kraja

Shuhet Arjan Kraja, heroi që shpëtoi jetën e dy fëmijëve në plazhin e Velipojës që rrezikonin të mbyteshin.

Ai ndodhej në gjendje kome prej 3 muajsh, si pasojë e ishemisë së shkaktuar pasi shpëtoi dy fëmijët, por nuk ia doli dot.

Arjan Kraja ishte punonjës i OSSH, me këta të fundit që kanë dhënë lajmin e hidhur dhe i kanë shprehur ngushëllime familjes së tij.

“Me keqardhje të thellë Ekipi i Operatorit të Sistemit të Shpërndarjes #OSSH, ka marrë lajmin për ndarjen nga jeta të kolegut të dashur, Arjan Kraja.

Gjatë viteve të tij në detyrë si shef grup, Arjani u dallua për përkushtimin profesional, ndershmërinë në punë, si dhe mirësinë e tij njerëzore, që e bënte të respektuar e të dashur nga të gjithë kolegët,” shprehet Ekipi i Operatorit të Sistemit të Shpërndarjes duke përfunduar:

“Në këto momente të dhimbshme, i shprehim ngushëllimet më të sinqerta familjes, të afërmve dhe miqve të tij.”