“Shpirti” me 28 masa sigurimi, kreu i SPAK jep detaje: Të përfshirë, prokurorë, punonjës policie, administratorë lokalë…
Pas finalizimit të operacionit ndërkombëtar “Shpirti” me 38 urdhër arreste ku 28 janë ekzekutuara sot, krerët e Europol, policisë dhe prokurorisë shqiptare si dhe asaj italiane kanë dalë sot në një konferencë për media ku kanë dhënë detaje për aksionin i cili u shtri në Shqipëri, Mal të Zi, Itali dhe Spanjë, për fazën e parë të të cilit kishin folur një vit më parë. Drejtuesi i SPAK, Arben Kraja, tha se është një skuadër e përbashkët që mbi 1 vit e gjysmë ka ushtruar aktivitet dhe ka kryer hetime të përbashkëta, një shkëmbim informacioni i mëhershëm dhe shumë i suksesshëm ndërsa foli për miliona euro pasuri të sekuestruar si dhe 4 bashkëpunëtorë të drejtësisë.
“I rëndësishëm në grumbullimin e provave dhe në arritjen e një konkluzioni konkret. Ekzekutimi i 28 masave të sigurimit sot nga SPAK. Një moment i rëndësishëm është hetimi i gjithanshëm që është kryer. Është hetuar dhe vërtetuar i gjithë zinxhiri i trafikut të drogës. Është evidentuar dhe provuar përfshirja e zyrtarëve të ndryshëm publikë në këtë aktivitet duke favorizuar këtë aktivitet. Bëhet fjalë për prokurorë, punonjës policie, administratorë të pushtetit lokal. Gjithashtu janë sekuestruar pasuri të luajtshme dhe paluajshtme, aktivitete tregtare me disa milionë euro vlerë,” tha kreu i SPAK duke shtuar se ishin 4 bashkëpunëtorë të drejtësisë që kanë dhënë kontributin e tyre në këtë hetim.
“Kemi pasur akuza dhe për pastrim të produkteve të veprës penale. Një vit më parë ishin në një konferencë në Romë ku sqaruam fazën e parë të këtij operacioni dhe unë theksova se do t’i shkojmë deri në fund hetimit për të zbuluar këdo që është i përfshirë që të përgjigjet penalisht, përfshirë dhe zyrtarë publikë,” tha kreu i SPAK, Arben Kraja duke përfunduar:
“Jemi në situatën ku e kemi mbajtur premtimin dhe do vazhdojmë në të njëjtën rrugë.”
Prokurori Kombëtar i Antimafias dhe Antiterrorizmit në Itali, Federico Cafiero De Raho, duke folur për operacionin “Shpirti” i cili u shtri në 4 shtete përfshirë Shqipërinë, tha se ndiqej prej disa muajsh nga SPAK dhe Prokuroria e Barit me një skuadër investigative të përbashkët ku EUROJUST si ideatori i aksionit ka bërë një ndarje konstante të informacionit.
“Dua të falënderoj Arben Krajën, të cilit i shpreh komplimente. SPAK po çon para punën prej disa kohësh që kur Arben Kraja mori këtë detyrë. Duhet të nënvizojë se në këtë operacion që ndiqet prej disa muajsh nga SPAK me Prokurorinë e Barit, me një skuadër investigative të përbashkët. Kjo skuadër e përbashkët, ndjek disa skuadra investigative që janë bërë në kohë.
Dua të them se bashkëpunimi mes Shqipërisë dhe Italisë, është e ngushtë dhe konstant. Sot në këtë pikë u arriti një objektiv që tregon se si bashkë mund të zbulojmë dhe aspekte që kanë të bëjnë me disa padrejtësi që bëhen nga disa institucione. Dua të nënvizoj faktin se operacioni i bërë nga EUROJUST ka bërë një ndarje konstante të informacionit. Bashkëpunimi Itali-Shqipëri konsiston që të krijohen strukturat për të luftuar kriminalitetin e organizuar. Kjo është me rëndësi pasi qytetarët mund të kenë besim tek strukturat e këtij operacioni. Dua të them se struktura hetimore italiane dhe policia shqiptare kanë zhvilluar një punë me shumë delikatesë dhe për këtë nënvizojë se falë punës së tyre u arrit që të zbarkohej një grup kriminal transnacional. Do bashkëpunojmë me Arben Krajën dhe skuadrën e tij,” siguroi Prokurori Kombëtar i Antimafias dhe Antiterrorizmit në Itali, Federico Cafiero De Raho.
Ndërkohë Përfaqësuesi i Eurojust, Filippo Spiezia, tha se kriminaliteti shqiptar e italian janë të verifikuara tashmë në nivelet më të larta të kriminalitetit botëror dhe veprimi i fundit është shumë i rëndësishëm.
”Faleminderit zoti prokuror, faleminderit për ftesën. Prokurorit të Barit, kolegëve të SPAK dhe Prokurosë së Barit, Anti-Mafias, drejtorit të DIA-s, Policisë shqiptare dhe italiane të përfshirë në këtë operacion të shkëlqyer. Komplimentet e mia në këtë veprim të rëndësishëm.
Niveli shumë të lartë, krimi i organizuar transnacional.
Të sigurojmë ligjshmërinë dhe zhvillimin ekonomik. Pa luftuar riciklimin e parasë s’mund të ketë zhvillim ekonomik. Në një punë që është akoma më e gjatë, sepse kriminaliteti shqiptar dhe italian mafioz tashmë janë të verifikuara në nivelet më të larta të kriminalitetit botëror dhe është shumë e rëndësishme që ky udhëtim të vazhdojë.” tha Spiezia ndërsa u falënderuar nga kreu i SPAK mbështetja nga Eurojust, ku janë dhe prokuror përfaqësues që shkëmbejmë informacion.
