Shqetësime për ndryshim kufijsh, Palmer: Edhe konflikti i ngrirë përbën rrezik…

Zv/ndihmës-sekretari amerikan i Shtetit, Matthew Palmer tha se Washingtoni i bën thirrje Prishtinës dhe Beogradit të shohin “mundësinë historike” dhe të arrijnë marrëveshje përmes së cilës “të dyja palët do të ishin fituese”.

“Nëse dikush është fitues dhe tjetri humbës, atëherë askush nuk fiton”, tha Palmer në Beograd gjatë fjalës së tij në Forumin e sigurisë “Fuqizimi i vendeve të Ballkanit”, raporton Agjencia serbe e lajmeve, BETA.

Sipas zyrtarit të lartë të Departamentit të Shtetit, SHBA nuk shtyn dhe nuk angazhohet për çfarëdo rezultati të caktuar në dialogun ndërmjet Prishtinës dhe Beogradit.

“Ne po inkurajojmë palët të gjejnë rrugën përpara si dhe një zgjidhje afatgjatë dhe të qëndrueshmë të cilën do ta pranonin dyja palët” është shprehur Palmer.

Zv/ndihmës-sekretari amerikan i Shtetit ka theksuar se SHBA-ja është e gatshme të dëgjojë dhe ndihmojë, por nuk mund të flasë për detaje, para së gjithash, lidhur me një ndryshim të mundshëm të kufirit, pasi nuk është paraqitur asnjë plan.

Sipas tij, SHBA-ja e kupton shqetësimin për mundësinë që ndryshimi i kufijve të përbëjë krizë në vendet tjera në rajon, mirëpo ka theksuar se konflikti i pazgjidhur dhe i ngrirë “po ashtu rrezikon stabilitetin e rajonit”.

Palmer tha se Kosova dhe Serbia kanë të ardhme evropiane por në këtë rrugë iu duhet ndihma.

Sa u përket vendeve te rajonit, Palmer tha se nëse Shkupi nuk ka alternativë ndaj Marrëveshjes së Prespës, nëse dëshiron integrimin në NATO dhe BE si dhe ka ftuar udhëheqësit politikë të Maqedonisë të tejkalojnë politikën partiake dhe të shfrytëzojnë të ardhmen evropiane.

Edhe për situatën në Bosnje dhe Hercegovinë, Palmer gjithashtu ka shprehur mbështetjen e SHBA-ve për integritetin territorial duke thënë se problem më i madh i atij vendi janë “politikanët e korruptuar të cilët e shfrytëzojnë retorikën nacionaliste për të krijuar ndarje”.

SHBA-të sipas tij dëshirojnë t’iu ndihmojnë gjitha vendeve të Ballkanit.

“Një Ballkan Perëndimor i fuqishëm do të thotë një Evropë më e fuqishme dhe rrjedhimisht një partneritet euroatlantik më i fuqishëm” ka deklaruar Palmer.