Shqipëri, hyrjet e të huajve u rritën me 18% në krahasim me para pandeminë

Shqipëria po përjeton në 2022 vitin më të mirë historik deri tani për sa i përket hyrjes së shtetasve të huaj, që si synim kryesor kanë turizmin.

Sipas të dhënave të INSTAT, në periudhën janar-shtator në vend kanë hyrë gjithsej 6.4 milionë shtetas të huaj. Kjo shifër është 32% më e lartë se e njëjta periudhë e vitit të kaluar dhe 18% më shumë se janar-shtatori i 2019-s, që mbante deri tani rekordin si viti më i mirë turistik, që më pas u ndërpre nga pandemia.

Vetëm në shtator, në vend hynë 761 mijë shtetas, me rritje 54% në krahasim me të njëjtën periudhë të një viti më parë dhe 29% në raport me 9 mujorin e 2019-s.

Sipas INSTAT, 94% e hyrjeve të shtetasve të huaj kishin si qëllim vizitë personale tek të afërm, apo qëllime turistike.

Sipas INSTAT, në shtator 2022, nga vendet që kanë hyrjet më të larta të shtetasve në Shqipëri, Spanja ka pasur rritjen më të madhe me 3,8 herë dhe Maqedonia e Veriut me 3,3 herë, krahasuar me Shtator 2021.

Gjatë 9-mujorit 2022, nga vendet që kanë hyrjet më të larta të shtetasve në Shqipëri, Spanja ka pasur rritjen më të madhe me 4,0 herë dhe Anglia me 2,0 herë, ndërsa Zvicra ka pasur rritjen më të ulët me 11,5 %, krahasuar me të njëjtën periudhë të vitit 2021.

Vijnë të huajt, shqiptarët ikin jashtë

Ndërsa janë rritur hyrjet e të huajve në vend, e njëjta tendencë është konstatuar dhe me daljet e shtetasve shqiptarë, që këtë vit nuk kanë pasur kufizime për të udhëtuar jashtë vendit.

Sipas INSTAT, daljet e shtetasve shqiptarë dhe të huaj nga territori i Shqipërisë, gjatë muajit shtator 2022, janë 1.371.621, duke shënuar një rritje me 42,7 %, krahasuar me të njëjtën periudhë të një viti më parë.

Daljet e shtetasve shqiptarë nga territori i Shqipërisë, gjatë muajit shtator 2022 janë 541.216.

Krahasuar me shtator 2021, ky numër është rritur me 47,6 %.

Daljet e shtetasve të huaj nga territori i Shqipërisë gjatë muajit shtator 2022, janë 830.405. Krahasuar me shtator 2021, ky numër është rritur me 39,6 %.

Numri i shtetasve shqiptarë të dalë nga territori i Shqipërisë gjatë nëntëmujorit 2022, është 4.390.611, duke u rritur 36.2 %, krahasuar me të njëjtën periudhë të një viti më parë.

Rriten ndjeshëm udhëtimet përmes ajrit

Sipas INSTAT, në nëntëmujorin e vitit 2022, hyrjet dhe daljet e shtetasve shqiptarë dhe të huaj sipas mënyrës së udhëtimit paraqiten:

Numri i shtetasve që kanë hyrë:

– Nga pikat ajrore është rritur me 83,9%, krahasuar me të njëjtën periudhë të një viti më parë;

– Nga pikat detare është rritur me 47,3%, krahasuar me të njëjtën periudhë të një viti më parë;

– Nga pikat kufitare tokësore është rritur me 25,3%, krahasuar me të njëjtën periudhë të një viti më parë.

Numri i shtetasve që kanë dalë:

– Nga pikat ajrore është rritur me 86,5%, krahasuar me të njëjtën periudhë të një viti më parë;

– Nga pikat detare është rritur me 57,0%, krahasuar me të njëjtën periudhë të një viti më parë;

– Nga pikat kufitare tokësore është rritur me 28,8%, krahasuar me të njëjtën periudhë të një viti më parë./Monitor/