“Shqipëri pa kanabis”, Lleshaj: Ne duam, ne kemi…

Edi Rama mund të mos dijë shumë gjëra për të bërë, ama për propagandë dhe spektakle është pa konkurrencë. Kështu ndodhi edhe me aktivitetin që e kishte pagëzuar “Për një Shqipëri pa kanabis” ku fjalimet e Ministrit të Brendshëm dhe Drejtorit të Policisë lanë gojëhapur të pranishmit dhe jo vetëm.

Ministri i Brendshëm, Sandër Lleshaj gjatë fjalës së tij në këtë aktivitet tha se operacionet e fundit  policore tregojnë se qeveria është e angazhuar për të luftuar trafikun.

“Operacionet e realizuara së fundmi, si ai për vënien përpara drejtësisë të të shumëkërkuarit Klement Balili, ato për goditjen e disa rrjeteve të tjera të trafikimit të drogës, Operacioni “Rruga e Gabuar” për goditjen e një rrjeti të madh e të rrezikshëm të trafikimit të qenieve njerëzore, që u krye në bashkëpunim të ngushtë me partnerët tanë amerikane si dhe operacioni i djeshëm “Lulet e Pranverës”, që u krye në bashkëpunim me partnerët tanë italianë, provojnë së paku tri të vërteta të mëdha:

Së pari, ne kemi vullnet të padiskutueshëm. Pra, ne duam.

Së dyti, ne kemi kapacitete për këtë qëllim. Pra ne dimë.

Së treti, ne kemi mbështetje të madhe në këtë mision. Pra ne nuk jemi vetëm.

Sipas Lleshajt dy betja të tjera të rëndësishme janë lufta kundër krimit e korrupsionit dhe ajo kundër emigracionit ilegal dhe trafikimit të qënieve njerëzore.

“Sigurisht që ne nuk mund të ndalojmë këtu. As kundër kanabisit as kundër veprimtarive të tjera kriminale. Shumë beteja të tjera janë për t’u finalizuar. Lufta kundër krimit të organizuar dhe korrupsionit si dhe ajo kundër migracionit ilegal dhe trafikimit të qenieve njerëzore janë dy të tjera po aq të rëndësishme,” tha Lleshaj.

Veliu: Në 2018-ën, më pak kanabis në Shqipëri

 Drejtori i Policisë së Shtetit, Ardi Veliu shkojë shumë më larg se eprori i tij, duke sjellë statistika nga viti 2018, duke theksuar se kishte më pak prodhim të bimëve narkotike dhe trafiku drejt Italisë u ul me 81%.

“Rezultatet e arritura përgjatë vitit 2018 janë ndër më të mirat që nga fillimet e viteve 90. Evidentuam 263 vepra penale për kultivim të bimëve narkotike. Janë implikuar 220 shtetas. Janë arrestuar e ndaluar 106 shtetas. Janë konstatuar janë asgjësuar 35.985 bimë narkotike.

Veli i krahasoi edhe me një vit më parë, që rezulton se janë: 30 raste kultivimi më pak.  30.942 bimë narkotike më pak. 9.689 fidanë/kubikë më pak.Me vendosmëri reaguam, tha Drejtori i Policisë së Shtetit, Ardi Veliu, ndaj çdo konstatimi të moszbatimit të detyrave funksionale, implikimi apo shkelje të Rregullores së Policisë së Shtetit, ku si rezultat gjatë vitit 2018 u përjashtuan nga policia 14 punonjës policie si dhe u arrestuan apo ndaluan 9 të tjerë.