“Shqipëri pa kanabis”, Soreca: Konfiskoni paratë e ardhura nga krimi

Pas raportimit të shifrave të “Për një Shqipëri pa kanabis”, Ambasadori i BE në Tiranë, Luigi Soreca, theksoi sërish nevojën që sekuestrimet e parave të ardhura nga krimi i organizuar duhet të konfiskohen.

“Krimi i organizuar transnacional është kërcënim për sigurinë tonë dhe duhen luftuar në mënyrë të përbashkët. Parimi ndiq paranë është thelbësor për të ndërprerë aktivitetin e krimit të organizuar por sekuestrimi duhet të ndiqet nga vendime përfundimtar e të konfiskimit të aseteve kriminale,” tha Ambasadori Soreca duke përsëritur se askush nuk qëndron mbi ligjin pavarësisht emrit,  funksionit apo pasurisë.

“Kultura e imunitetit që ka dominuar për shumë e shumë kohë ka nisur të ndryshojë, kjo në sajë të Reformës në Drejtësi dhe krijimit të një gjyqësori të pavarur dhe profesional e institucioneve të prokurorisë. Rezultatet e sotme të luftës kundër kanabisit duhet të ruhen dhe në muajt e vitet në vijim sepse droga është një kërcënim që ndryshon nga hera.”

Me këtë rast, Ambasadori i BE foli për sfidat e reja:

“Janë këto rrjete polikriminale dhe dinamike dhe delokalizimi i kultivimit dhe diversifikimit të drogës, përfshirë kokainës që kontrabandohet nga krimi i organziuar janë sfidat e reja.” 

Në fund, Ambasadori i BE në Tiranë, Luigi Soreca, tha se Bashkimi Europian do të vërë në dispozicion fondin prej 20 milionë euro për të përmirësuar kapacitetet e policisë por dhe për të trajtuar shkaqet.