Shqipëria dhe Mali i Zi vazhdojnë sanksionet ndaj Rusisë

Shqipëria, Mali i Zi, Ukraina dhe Norvegjia i janë bashkuar vazhdimit të sanksioneve të BE kundër Rusisë për shkak të, siç është arsyetuar, aksioneve kundër integritetit territorial ukrainas, sovranitetit dhe pavarësisë. Këtë e konfirmon Deklarata e Përfaqësuesit të Lartë për Politikë të Jashtme dhe Siguri pranë BE mbi harmonizimin e vendeve të caktuara me vendimin e Bashkimit Europian, i cili është bërë publik nga Këshilli Evropian i BE. 

“Më 10 shtator 2021, Këshilli ka miratuar Vendimin (ZSBP) 2021/1470 mbi ndryshimin e Vendimit 2014/145/ZSBP. Me Vendimin e Këshillit janë vazhduar masat kufizuese për gjashtë muajt e ardhshëm, deri më 15 mars 2022. Vendet kandidate Mali i Zi dhe Shqipëria, dhe vendi i EFTA, Norvegjia, anëtare e hapësirës ekonomike evropiane, si dhe Ukraina, harmonizohen me këtë Vendim të Këshillit Evropian,” thuhet në dokument ku saktësohet se këto vende do të sigurojnë që politikat e tyre kombëtare do të jenë në përputhje me këtë vendim të Këshillit.

“Bashkimi Europian vihet në dijeni për këtë detyrim dhe e përshëndet,” thuhet në dokument.

Ndryshe, më 10 shtator, Këshilli i BE ka vendosur të vazhdoj sanksionet kundër Rusisë edhe për gjashtë muaj për shkak të aksioneve që minojnë integritetin territorial, sovranitetin dhe pavarësinë e Ukrainës.

Masat kufizuese kundër aksioneve që, siç theksojnë në BE, minojnë ose kërcënojnë integritetin territorial, sovranitetin dhe pavarësinë e Ukrainës për herë të parë janë vendosur më 17 mars të vitit 2014.

Masat kufizuese parashikojnë kufizimin e udhëtimeve, ngrirjen e pasurisë dhe ndalimin e vendosjes në disponim të mjeteve ose burimeve tjera ekonomike, personave ose subjekteve që janë në listë. Sanksionet do të vazhdojnë të zbatohen për 177 individë dhe 48 institucione.