Shqipëria e filloi presidencën e KS OKB

Shqipëria e filloi presidencën e saj të Këshillit të Sigurimit duke hapur një debat që ka në fokus çështjen e rëndësishme të përgjegjshmërisë, tha kryeministri Rama sot në selinë e Kombet e Bashkuara.

Duke marrë presidencën në Këshillin e Sigurimit, kryeministri Edi Rama renditi prioritetet kryesore të mandatit të Shqipërisë duke i cilësuar ato si themelin e politikës së jashtme të vendit të tij.

“Mbështetja e ligjit ndërkombëtar, mbrojtja dhe promovimi i Kartës së OKB-së për të drejtat e njeriut dhe mbështetja e sistemit të OKB-së dhe multilateralizmit janë thelbi i politikës së jashtme të Shqipërisë. Ato janë gjithashtu prioritetet kryesore të mandatit tonë në Këshillin e Sigurimit”.

Kryeministri Rama tha se konfliktet dhe pasojat shkatërruese për civilët janë bërë mjaft të përhapura dhe vdekjeprurëse duke e bërë nevojën për llogaridhënie, një çështje kyçe për Kombet e Bashkuara dhe shtetet e saj anëtare.

“Siç e kemi parë të gjithë, lufta e Rusisë në Ukrainë, e cila paraqet sfida dhe kërcënime të shumta në mbarë botën, vetëm sa e ka përforcuar këtë domosdoshmëri. Përgjegjësia për krimet dhe shkeljet e rënda, duke përfshirë përgjegjësinë individuale sipas ligjit penal, është thelbësore për rifillimin e besimit të publikut tek institucionet e drejtësisë dhe sigurisë, duke përfshirë Këshillin e Sigurimit, dhe për të rindërtuar sundimin e ligjit dhe paqen e qëndrueshme”, tha kryeministri Rama.

Sipas kryeministrit shqiptar debati i sotëm do të përqëndrohet jo vetëm në rritjen e rolit të bashkësisë ndërkombëtare për t’i mbajtur shtetet përgjegjëse për shkelje të rënda të së drejtës ndërkombëtare, por edhe në mekanizmat e përgjegjshmërisë së komunikimit jo vetëm në nivel shtetëror, por edhe në nivel rajonal dhe ndërkombëtar.

Një objektiv i rëndësishëm i këtij debati do të jetë sjellja e vëmendjes së nevojshme për viktimat.

“Përcaktimi i së vërtetës për krimet ndërkombëtare dhe shkeljet e rënda të të drejtave ndërkombëtare të njeriut dhe shkeljet e rënda të së drejtës ndërkombëtare humanitare, janë thelbësore për rivendosjen e të drejtave dhe dinjitetit të viktimave dhe të afërmve të tyre. Është gjithashtu e rëndësishme të avancohet drejt paqes dhe pajtimit”, tha kryeministri Rama.

Llogaridhënia efektive, tha kryeministri Rama do të kontribuojë në paqen, pajtimin dhe rritjen e sigurisë për të ndërtuar demokracinë në nivel lokal, rajonal dhe global dhe për të mbrojtur dhe promovuar të drejtat e njeriut kudo.

Në debatin e sotëm ishin ftuar figura të shquara dhe ekspertë të ligjit ndërkombëtar përshi presidenten e gjykatës Ndërkombëtare Penale Joan Donoghue dhe Komisioneren e Lartë të Kombeve të Bashkuara për të Drejtat e Njeriut Michelle Bachelet./VOA/