Shqipëria e fundit me numrin e mjekëve, PD: Dështim i Edi Ramës që kushton jetë!
Pas publikimit të Raportit të Organizatës Botërore të Shëndetësisë, OBSH, e cila e rendit Shqipërinë ndër vendet që kanë numrin më të ulët të mjekëve në botë në raport me popullsinë, ka reaguar Partia Demokratike përmes Ish-Deputetit Dr.Bardh Spahia duke e konsideruar një dështim gjigand të Edi Ramës që kushton jetë, rrjep xhepat e qytetarëve, largon mjekët dhe infermierët.
“Shqipëria e fundit, sërish e fundit dhe vetëm e fundit me Edi Ramën. Shëndetësia është në pikën e saj më të ulët, e keqfinancuar për t’u shërbyer qytetarëve, sepse qeveria po paguan miliona euro për koncesionet korruptive,” thekson Dr.Bardh Spahia në reagimin e tij përmes rrjetit social Facebook duke e shoqëruar dhe me një video ndërsa përfundon:
“Shëndetësia e Edi Ramës është më keq se të gjithë në rajon. Një dështim gjigand që kushton jetë, rrjep xhepat e qytetarëve, largon mjekët dhe infermierët.”
Ndryshe, sipas raportit të fundit të OBSH që rendit Shqipërisë ndër vendet që kanë numrin më të ulët të mjekëve në botë dhe më të ultin në Evropë në raport me popullsinë, Shqipëria ka vetëm 12 mjekë për 10 mijë banorë, Maqedonia e Veriut ka 29, Serbia 31, Mali i Zi 27 ndërsa Bosnja 22. Rekordin në Europë e mban Greqia, me 55 mjekë për 10 mijë banorë. Italia 40, Gjermania 42.5, Suedia 40 dhe Austria 51.7.
