Shqipëria Madhështore, Berisha: Do nxjerrim vendin nga skamja!

Koalicioni i krijuar, “PD dhe Aleanca për Shqipërinë Madhështore”, është premtimi më i madh për shqiptarët pas përmbysjes së diktaturës komuniste, tha sot Kryetari i Partisë Demokratike, Sali Berisha, duke zotuar se do të jetë ky koalicion që do nxjerr vendin nga skamja.

Shqipëria Madhështore, tha Kryetari i Partisë Demokratike, do jetë Shqipëria e projekteve të mëdha ndërsa skeptikëve u rikujtoj se Shqipëria e viteve 2005-2008 u bë Shqipëria e projekteve më të mëdha në fushën e energjisë në Europë!
“Është premtimi më real, më madhështor që është bërë ndonjëherë në Shqipëri.
Unë e kuptoj se njerëz të lodhur, njerëz pse dhe jo të rraskapitur nga skamja, të dëshpëruar nga brutaliteti i narkodiktaturës, mendojnë se Shqipëria Madhështore është Shqipëria e largët.
Por unë jam sot para jush për të garantuar ata se Shqipëria Madhështore do jetë më e afërt se kurrë dhe do jetë një realitet i mrekullueshëm për shqiptarët në Shqipëri dhe kudo në botë.
Shqipëria Madhështore ka si kusht të të gjitha kushteve që asnjë shqiptar i vetëm të mos njohë më varfërinë ekstreme.

Në këtë kontekst, paketa jonë për vendosjen e minimumit jetik 200 euro dhe indeksimin e tij të përvitshëm me shkallën e rritjes së çmimeve, vendosja e rrogës minimale 500 euro, e rrogës mesatare 1200 euro, rritja e pensioneve me 20 përqind, ulja e çmimit të naftës me 30-40 përqind, vendosja e kartës së konsumatorit për të gjithë ata që marrin pensione, minimum jetik dhe rroga të ulëta për të rimbursuar shumën përafërsisht 450 euro në vit për ushqimet dhe gjërat bazë që blejnë.
Çmimi i energjisë prej 7 lekë.
Çmimi i energjisë për bizneset nga 18-24 që është sot, në 6 lekë.
Pjesëtimi me 5 i çmimit për pronën etj do i japin një çlirim të menjëhershëm shqiptarëve nga dhimbjet e skamjes ekstreme.
Pra, në qoftë se do të flasim në terma apolitike, kjo është kolona e dhembshurisë njerëzore.
Shqipëria Madhështore bazohet në kolonën e dhembshurisë njerëzore.
Për çka do të ketë në përmbysje të plotë të shpërndarjes së të ardhurave.
Shqipëria nuk do ishte kurrë madhështore nëse nuk do ishte Shqipëria e prodhimit të të mirave, Shqipëria e prodhimeve që do mbushin tregjet e vendit dhe tregjet ndërkombëtare. ‘Made in Albania’ do jetë motoja e krenarisë së shqiptarëve.
‘Made in Albania’, etiketa e prodhimit në Shqipëri do përbëjë moton e krenarisë së betejës së shqiptarëve.
Nga jugu në veri, lindja në perëndim, nuk gjen kurrë 28 mijë kilometra katrorë me potenciale kaq të jashtëzakonshme si në këtë tokë.
Ndaj dhe, duke vendosur në epiqendër të programit tonë ekonominë, ekonominë, ekonominë, ne rikthehemi me fuqinë më të madhe për të vendosur në piedestal Shqipërinë që prodhon.
Por një gjë që dua të them, ata të cilët dëgjojnë me skepticizëm këto fjalë, që dëgjojnë me skepticizëm shtyllën e dhembshurisë apo Shqipërisë së jetueshme, atyre u kujtoj se ka qenë kjo forcë politike që ka dyfishuar rrogat dhe pensionet si asnjë forcë tjetër politike në atë kohë në Europë dhe në historinë e këtij vendi në 8 vite.
Ata që thonë se ‘Made in Albania’, se prodhimi do jetë baza e krenarisë shqiptare, dhe e konsiderojnë këtë një ekzagjerim, nuk duhet të harrojnë se jemi ne, vështroni shifrat, rritëm me 320 përqind eksportet, të cilat nga viti i kaluar në këtë vit ranë me 32 përqind.
Pra, nxitja e prodhimit dhe eksportit dhe klima më miqësore ndaj biznesit, Shqipëria e taksave të ulëta, potencialet e jashtëzakonshme natyrore, janë të gjitha këto faktorë që shndërrojnë ‘Made in Albania’ në moto kryesore jo vetëm të krenarisë, por edhe të begatimit të shqiptarëve,” tha sot Sali Berisha duke rikujtuar se PD e ka provuar veten se është e aftë t’i realizojë ato.

“Shqipëria Madhështore mund të mos jetë Shqipëria e projekteve të mëdha. Unë e di se edhe ndaj këtij premtimi ka skeptikë. Por skeptikëve u rikujtoj se Shqipëria e viteve 2005-2008 u bë Shqipëria e projekteve më të mëdha në fushën e energjisë në Europë. A nuk ishte TAP projekti më i rëndësishëm dhe strategjik për energjinë në Europë? A nuk ishte Kaskada e Devollit projekti i hidrocentralit më të madh që po ndërtohej në kohën e vet? A nuk u firmosën 434 kontrata për hidrocentrale? A nuk kishte pra në këtë projekt madhështi, aq sa ftoj mediat të rrëmojnë në arkivat e tyre dhe të gjejnë se si opozita e asaj kohë dhe të tjerët talleshin, kur ne shpallnim Shqipëria superfuqi energjetike rajonale.
Ku jemi sot? Ato projekte, ajo moto bëri që sot ato hidrocentrale të ndërtuara, të firmosura në atë periudhë, të përbëjnë bazën e rritjes së prodhimit të energjisë me 70 përqind, tha Kryetari i Partisë Demokratike.
Shqipëria Madhështore nënkupton pra projekte të mëdha si shndërrimin e vendit në epiqendër të teknologjive më të larta, më të avancuara. Dataqendrave, internetit 3, blockchain, bitcoin, kriptomonedha, inteligjencë artificiale.
Prapë, kërkoj nga mediat të rrëmojnë në të shkuarën e afërt të kësaj force politike që premton këto. Në vitin 2005, penetrimi i internetit në Shqipëri ishte 4.8 përqind. Në fund të vitit 2005 deklarova se do sjellim Shqipërinë në moshën dixhitale.
Reagimi ishte përqeshje dhe nënqeshje, jo vetëm nga kundërshtarët, por edhe nga mediat.
E vërteta është se në vitin 2013, Shqipëria arriti një penetrim interneti prej 63 përqind. Shqipëria u bë një nga vendet me aksesin më të lehtë në internet në botë. 1250 qendra u hapën në të gjithië vendin ku qytetarët mund të përdornin internetin falas,” tha Kryetari i Partisë Demokratike, Sali Berisha, duke përfunduar:
“Pra, nuk u ndala në asgjë tjetër në këtë të shkuar, për të treguar se disa herë më madhështore do jetë Shqipëria e viteve që vijnë se ajo që unë citova.
Se Shqipëria dhe shqiptarët janë të aftë të realizojnë projektet më madhështore dhe këtë e kanë faktuar.
Kush e mendonte se vendi më i izoluar i planetit dhe më i pasigurt do bëhet anëtar i NATO-s? Ajo u bë realitet.
A nuk ishte madhështi kalimi i shqiptarëve nga grupi i vendeve me të ardhura të ulëta te grupi i vendeve me të ardhura të mesme të larta, që u quajt një kërcim kuantik?
Pra, këto janë të gjitha shtyllat e programit, me të cilat ne do paraqitemi çdo ditë, çdo orë para qytetarëve.”