Shqipëria mburret me Diellën, BE do hap fabrika të Inteligjencës Artificiale në Serbi dhe Maqedoni V.

Derisa Kryeministri i Shqipërisë vazhdon dhe mburret me ministren e paligjshme AI, Diella, Presidentja e KE bëri të ditur në Shkup ngritjen e fabrikave të inteligjencës artificiale në Maqedoninë e Veriut dhe Serbi. 

Presidentja e Komisionit Evropian, Ursula von der Leyen, gjatë qëndrimit në Shkup diskutoi për perspektivën evropiane, progresin e proceseve reformuese, bashkëpunimin ekonomik, sigurinë energjetike dhe transformimin digjital në Maqedoninë e Veriut, në takimet që zhvilloi me presidenten Gordana Siljanovska Davkova, kryeministrin Hristijan Mickovski, dhe, kryetarin e Parlamentit, Afrim Gashi.

Ne e mbështesim plotësisht Maqedoninë e Veriut në rrugën e saj drejt BE-së – tha Ursula von der Leyen duke shtuar: “Hapi juaj i ardhshëm dhe i vetëm para hapjes së negociatave është i qartë, duhet të bëni ndryshimet kushtetuese. Topi është në fushën tuaj. BE-ja është e gatshme.”

Mickovski: Jemi të gatshëm për përmbushjen e standardeve

Kryeministri Mickoski theksoi gatishmërinë e qeverisë për përshpejtimin e integrimit evropian të vendit, përmes rezultateve konkrete dhe përmbushjes së standardeve evropiane.

“Maqedonia e Veriut nga Bashkimi Evropian pret përkushtim të qartë dhe konkret, si konfirmim i perspektivës evropiane dhe mbështetje për qytetarët, të cilët me dekada mbeten të përkushtuar ndaj vlerave evropiane”, tha Hristijan Mickovski.

Von der Leyen: Fabrika të inteligjencës artificiale në Ballkanin Perëndimor

Presidentja e Komisionit Evropian von der Leyen i njoftoi autoritetet e Shkupit për dy projekte, ngritjen e fabrikave të inteligjencës artificiale në Maqedoninë e Veriut dhe Serbi. Ky është një zgjerim i programit të Antenave të Fabrikës së Inteligjencës Artificiale AIFA në shtatë shtete anëtare të BE-së dhe gjashtë vende partnere, përfshirë këtu Maqedoninë e Veriut.

“Dua t’ju njoftoj se do të hapim fabrikat tona të inteligjencës artificiale në Ballkanin Perëndimor. Do të fillojmë me dy antena në Maqedoninë e Veriut dhe Serbi, duke prezantuar një rrjet të shpejtë digjital në të gjithë rajonin që do t’u lejojë kompanive të gjashtë partnerëve të lidhen me këto fabrika”, sqaroi von der Leyen. Kjo do të thotë që kompanitë nga Ballkani Perëndimor do të mund të hyjnë në infrastrukturën evropiane për inteligjencën artificiale.

Mickovski: Jam i emocionuar dhe i lumtur

Kryeministri i RMV-së Hristijan Mickoski tha se është i kënaqur me njoftimet se në vend do të hapet një qendër e inteligjencës artificiale. Kjo është diçka e shkëlqyer për qytetarët e Maqedonisë.

“Ky është një bashkëfinancim i përbashkët me vlerë rreth pesë milionë euro. Kjo do të thotë që praktikisht studentët dhe ekspertët maqedonas do të mund të përdorin dhe të tërheqin burimet që ka vetë BE-ja. Deri tani kemi përdorur përvojat dhe burimet e vendeve fqinje, që tani e tutje do të kemi qendrën tonë, e cila do të merret me inteligjencën artificiale”, tha Mickovski.