Shqipëria, ndër vendet më obeze të Europës, më elegantët italianët
Përqindja e njerëzve të moshës 16 vjeç e lart që konsideroheshin mbipeshë, para-obez dhe obez, në vitin 2022 ishte 50.6 për qind në Bashkimin Europian, sipas të dhënave që janë përditësuar së fundmi nga Eurostat.
Shifrat përfshijnë dhe Shqipërinë, ku sipas Eurostat 56.5 për qind e shqiptarëve mbi 16 vjeç konsiderohen mbi peshë. Në këto nivele, Shqipëria renditet e 11 dhe konsiderohet si një ndër vendet që kanë nivelin më të lartë të obezitetit në Europë, duke u ngjyrosur në hartë me blu.
Më të shëndoshët e Europës janë maltezët, 62 për qind e të cilëve konsiderohen mbipeshë. Pas tyre vjen Finlanda 59.5 me për qind, Letonia 59.2 për qind, Rumania 58.9 për qind, Lituania 58.5 për qind, Polonia 57.8 për qind, Hungaria 57.5 për qind, Sllovakia 57.5 për qind, Kroacia 57.2 për qind, Turqia 57.1 për qind, dhe, më pas Shqipëria 56.5 për qind.
Më elegantët e Europës janë italianët, që kanë dhe përqindjen më të ulët të obezitetit, me 41.3 për qind, të ndjekur nga zviceranët 45.2 për qind, dhe, francezët 45.4% për qind.
Në rajon, për elegancë kryeson Mali i Zi, që e ka treguesin ndër më të ulëtit në Europë 47 për qind. Për Serbinë ky tregues është 51.8 për qind, ndërsa mungojnë të dhënat për shtetet e tjera të Rajonit. Maqedonia e Veriut e kishte këtë tregues 55 në vitin 2017.
Meshkujt shqiptarë më të shëndoshë se femrat
Femrat shqiptare duket se janë shumë më të kujdesshme se meshkujt. Sipas Eurostat, 62.3 për qind e meshkujve shqiptarë mbi 16 vjeç konsiderohen mbipeshë, ndër më të lartat në Europë. Meshkujt më të shëndoshë janë në Maltë dhe Sllovaki 69.4 për qind, dhe, më elegantët në Francë 51.5 për qind.
Gjysma e femrave shqiptare 50.9 për qind konsiderohen që janë mbipeshë, sipas të dhënave të Eurostat.
Me elegantet e Europës janë italianet 31.3 për qind dhe malazezet 34.6 për qind.
Femrat më të shëndosha janë në Letoni 56.7 për qind dhe Turqi 55.2 për qind.
Eurostat e mat obezitetin bazuar në treguesin Body Mass Index, BM, që është një rregull i përshtatshëm i përdorur për të kategorizuar gjerësisht një person bazuar në masën e indeve (muskujt, yndyrën dhe kockat) dhe lartësinë.
Treguesi mat përqindjen e njerëzve obezë bazuar në indeksin e tyre të masës trupore (BMI). Njerëzit e moshës 18 vjeç e lart konsiderohen obezë me një BMI të barabartë ose më të madhe se 30.
Kategoritë e tjera janë: nënpesha (BMI më pak se 18.5), pesha normale (BMI midis 18.5 dhe më pak se 25) dhe para-obeze (BMI midis 25 dhe më pak se 30). Kategoria mbipeshë (BMI e barabartë ose më e madhe se 25) kombinon dy kategoritë para-obez dhe obez./Monitor/
