Shqipëria në udhëkryq, Basha: Koha të zgjedhim rrugën e zhvillimit apo…

Shqipëria është në udhëkryq. Kështu u shpreh Kryetari i Partisë Demokratike, Lulzim Basha, në ceremoninë e 10 vjetorit të Fondacionit Shqiptaro-Amerikan për Zhvillim, duke konstatuar se tani është koha të zgjedhim rrugën e zhvillimit apo rrugën e tanishme me marsh indietro si tani me qeverinë aktuale.

“Dialogu me miqtë dhe partnerët tanë strategjikë është në zemër të së ardhmes plot shpresë për Shqipërinë. Askush nuk duhet ta vërë në dyshim: e ardhmja jonë është plot me shpresë.

Por sot kombi ynë ndodhet në udhëkryq. Ndërkohë që duam të afrohemi më shumë drejt miqve dhe partnerëve tanë në Bashkimin Europian dhe Shtetet e Bashkuara, ne na pret një punë kolosale, me reforma dhe ndryshime të mëdha përpara.”

Shqipëria është në krizë, thekson Lulzim Basha dhe potenciali ynë i madh fatkeqësisht nuk po realizohet.

“Ndaj dhe koha kur jemi mbledhur për të përkujtuar 10 vjetorin e AADF është domethënëse.

Në këtë udhëkryq ku ndodhemi sot, ne na duhet të zgjedhim cilën rrugë do të marrim. Do të zgjedhim rrugën e lirisë, transparencës, llogaridhënies dhe zhvillimit? Apo do vazhdojmë të ngecim në rrugën e tanishme, me marshin në indietro.”

Në situatën e krijuar, lideri i opozitës thekson se nuk ka zgjedhje tjetër për veç se të marrim rrugën e parë. Rrugën e zhvillimit.

“Dhe për ta bërë këtë të mundur, na duhet jo vetëm të punojmë ngushtësisht me ju, me miqtë e partnerët tanë euro-atlantikë, por të vëmë në jetë reforma dhe ndryshime të mëdha. Na duhet ta pastrojmë Shqipërinë.”

Koha, tha Basha, është të marrim vendime të përgjegjshme si liderë, duhet një qeveri që punon për njerëzit.

“Na duhet të marrim vendimet tona të përgjegjshme si liderë, për të respektuar bazat dhe parimet e demokracisë së vërtetë perëndimore.

Nuk mund të lejojmë më korrupsionin ti zërë frymën qytetarëve tanë.

Nuk mund të lejojmë më qeverisjen e mbyllur, inefiçente dhe inefektive të bëhet pengesë për jetën e përditshme dhe të ardhmen e shqiptarëve.”

Me këtë rast, Kryetari i Partisë Demokratike i bëri thirrje miqve, siç tha, në këtë sallë dhe kudo:

“Le të punojmë për Shqipërinë, le të punojmë së bashku për të ndërtuar një të ardhme më të mirë për fëmijët tanë.

Një të ardhme të hapjes dhe të transparencës.

Një të ardhme ku ato vlera të shenjta të mishëruara në vetë Kushtetutën Amerikane të bëhen pjesë e jetës tonë të përditshme.

Që të kemi një qeveri me të vërtetë të njerëzve, nga njerëzit dhe që punon ditë e natë për njerëzit.”

Në fund, Kryetari i Partisë Demokratike, Lulzim Basha, tha se ka besim se kjo e ardhme është shumë e afërt sepse beson tek Shqipëria, ndërsa përfundoi:

“Ju faleminderit për miqësinë dhe ndihmën tuaj të pakursyer në gjithë këto vite dhe dekada.

Dhe faleminderit që keni zgjedhur të jeni në krahun tonë në këtë rrugëtim për ta çuar vendin tonë dhe fëmijët tanë drejt zhvillimit dhe mirëqenies.”