Shqipëria n’ujë, sanitarja ha 8 biftekë…
nga Agim Popoci
Shqipëria sërish përfundoi në ujë me vetëm dy ditë reshje shiu, dhe askush nuk e kuptoi se si është e mundur që prurjet të jenë sa dyfishi i reshjeve apokaliptike të vitit 2010, niveli në kaskadën e Fierzës sot të jetë më i ulët ashtu si dhe prodhimi i energjisë elektrike, ama u informuan se Arben Ahmetaj hëngri një biftek prej 1000 dollarëve te Nusreti në Dubai, një shtet mik na fali vaksinën Anticovid sepse kemi fatin që kemi Kryeministër Edi Ramën ndonëse qeveris shtetin ku mjekut nuk i besohet por sanitares po, të cilës i jepet mundësia të shijon jo 1 siç bëri Ahmetaj por plotë 8 biftekë te Nusreti!
Dhe, e gjithë kjo katrahurë ndodhi në harkun kohor prej një jave deri sa ndaloi shiu, dhe sot kemi një Shqipëri të pushtuar nga shiu, të lodhur nga propaganda dhe një situatë të nderë ku intelektuali më nuk kërcënohet nga Edi Rama por përçmohet! Si?!
Të gjithë i kujtojnë reshjet apokaliptike të Janarit të vitit 2010 kur kulmi i prurjeve ishte 2260 m3/s, niveli në kaskadën e Fierzës 292.54 m dhe prodhim të energjisë 12.200 MW/orë, si dhe vendin e pushtuar nga shiu, siç u tha zyrtarisht nga Drejtori i KESH, Ministri i Energjetikës dhe Kryeministri, si kurrë më parë në histori.
Edi Rama, në atë kohë lider i opozitës dhe në cilësinë e kryetarit të PS bëri atë që bënë më së miri edhe sot, akuzoi Saliun: “Ky njeri që po e çon vendin nga rrënimi në rrënim, me zjarr në Gërdec, me shembje mali në Kalimash, me përmbytje të paparë në 100 vjet, siç thotë edhe vetë, në qarkun e Shkodrës, është kthyer në një farëmbjellës katastrofash. Po i mbyt me një ujë që po të ishte menaxhuar si duhet Fierza do të kishte prodhuar, jo përmbytjen apokaliptike të qarkut të Shkodrës, por 457.638 MW/h energji elektrike. Që e llogaritur me çmimin minimal, përbën një humbje për shtetin e për shqiptarët të barabartë me 3 miliardë e 523 milionë lekë të reja.”
Kjo mund të ishte edhe e vërtetë nëse kishim për bazë akuzat e opozitës për mungesë transparence, por shifrat raportoheshin çdo një orë, uji ishte aty ashtu si dhe prodhimi i energjisë dhe plaga më e madhe e zonës së Shkodrës, përmbytja.
Sot kur Edi Rama është Kryeministër, kur Drejtori i tij i KESH-it, Benet Beci, thotë se prurjet janë 4200 m3/s, kur niveli në kaskadën e Fierzës është 281.48 m dhe prodhimi i energjisë është rreth 800 MW/orë, dhe natyrisht zona është e përmbytur, pyetjet e para që shtrohen janë se ku shkoi uji, sa u prodhua energji me këtë sasi uji dhe cilat janë humbjet, dhe pakkush e ka mendjen se ku ha biftek 1000 dollarësh Arben Ahmetaj me shokë kur tashmë nuk dinë se çfarë të bëjnë me lekë!
Në mungesë të përgjigjes, ustai i propagandës dhe njëshi lypsar, lançon një video-darkë në Dubai, që tronditi shqiptarët të cilët realisht ishin shqetësuar për ata që si zakonisht përfundojnë në ujë! Video arriti të bëjë xhiron ndër shqiptarë dhe të shkaktoj një zemërim të madh si me pamjet që u servirën me zyrtarë që hanin si të babëzitur ndonëse qeverisin një vend të varfër, ashtu dhe me faktin se banorët e zonave të përmbytura jo që nuk e shijojnë por shumica as që e njohin fjalën biftek, pak rëndësi ka nëse e gatuan Nusreti apo Jorgo!
Kur kjo video arriti qëllimin dhe shqiptarët nuk po merreshin më me përmbytjen por menynë e Nusretit dhe çmimet e tij, lypsarit të paparë i ndodhi një e papritur, situata i doli jashtë kontrollit dhe qetësia ndër popull u trazua shumë më shumë se sa e kishte parashikuar laboratori i Fugës, dhe sërish u desh ndërhyrja e atit, birit dhe shpirtit të shenjtë të mashtrimit.
Vaksina kundër COVID-19 e premtuar në javën e tretë të Janarit erdhi në mejdanin e Air Albania një javë më përpara, dhe nuk e solli Arben Ahmetaj me shokë që po festonin faljen e Portit të Durrësit, por lypsari par exellence, që shyqyr që e kemi!
Nxituan mediat të transmetojnë arritjen e madhe, madje Edi Rama shkoi edhe më larg, dhe në kohën që lideri i opozitës Lulzim Basha po fliste nga zona e përmbytur e Sukthit, Kryeministri ndërhyri me pamje live për të transmetuar lajmin e madh se si do të nis vaksinimi në orën 15:00.
Të gjitha mediat, pa dallim, fikën përmbytjet dhe liderin e opozitës për të dëgjuar lypsarin se si do ta vaksinoj popullin shqiptar, duke i bërë me dije se kjo arritje ishte vetëm falë tij, Kryeministrit të Tiranës, Durrësit dhe gjithë Shqipërisë!
Por edhe kjo arritje kishte shumë pikëpyetje, dhe për shkak të sensibilitetit që ka virusi, jo lypsari, një vello misteri mbuloi vaksinën që arriti të shpoj Edi Ramën dhe sejmenët e tij të Komitetit por jo edhe të bindë shqiptarët, se pak rëndësi ka nëse nuk dihet nga dhe si erdhi.
Skepticizmi tek qeverisja e Edi Ramës e në veçanti vaksina Anticovid, që është problem global dhe jo i lypsarit pa konkurrencë shqiptar, bëri që laboratori i Fugës të mendoj për një injektim serioz në trurin e opinionit shqiptar.
Sërish video por tashmë më sensitive meqë kanë ngelur dhe pak ditë deri tek zgjedhjet vendimtare për të ardhmen e Edi Ramës. Shqiptarët shohin me zë dhe figurë një sanitare që merr 800.000 lekë ose rreth 6.500 euro për tu kujdesur për një të sëmurë nga COVID-19 meqë personeli mjekësor po e shpërfillte në spital! Dhe, për fat të keq, e prekura me koronavirus tashmë ka ndërruar jetë.
Lajmi mori dhenë, ministrja vigjilente e Shëndetësisë reagoi dhe shkarkoi sanitaren ndërsa video në rrjetet sociale dhe portalet idiote filloi infektimin e të gjithë atyre që kishin parë videon, nuk panë se ministrja nuk shkarkoi emrat tjerë të përfolur nga sanitarja, dhe ishin koshient se në spital nuk e zgjidh problemin ndryshe përveç se me lekë!
Çfarë na mësoj kjo përmbytje?!
Nuk ka ka lidhje se cilat janë prurjet e lumenjve, argjinaturat, gjendja e hidrovoreve apo prodhimi i energjisë;
Kur Edi Rama është në pushtet prurjet në kaskadë mund të jenë shumë më të mëdha por jo edhe niveli në kaskadë dhe prodhimi i energjisë, dhe ti me patjetër do të jesh i përmbytur.
Nuk ka lidhje a ju dha Porti i Durrësit Emirateve të Bashkua për menaxhim apo Arben Ahmetaj ha biftek 1000 dollarësh në Dubai;
Kur Edi Rama është në pushtet në burg do jenë ata shqiptarë në nuk paguan faturën e dritave 3000 lekë, dhe për bashkëpunëtor do ketë Arben Ahmetajn i cili u akuzua për privatizimin e Albetelcomit dhe miliona dollarëve ryshfet.
Nuk ka lidhje pse jep lekë për tu shëruar në spitale publike por mjekut nuk ke arsye ti besosh;
Sot, kur Edi Rama është në pushtet edhe i falin vaksina kundër COVID-19, por vendi që ai qeverisë njerëzit paguajnë për tu shëruar në spitale publike, sanitaren dhe jo mjekun! Kjo epokë e sapo filluar është dhe rreziku më i madh për kombin shqiptar! Ai më nuk e kërcënon inteligjencën, ai e përçmon…
