Shqipëria, parajsë e diktatorëve!
nga Agim Popoci
Pamjet nga morgu i Tiranës tmerruan opinionin publik shqiptar për ca orë duke e ndarë në dysh me debatin nëse ato foto duhen publikuar, me akuzat ndaj kryeministrit Edi Rama për keqqeverisje, që shumë shpejtë u përmbysën me shigjetat komuniste mbi opozitën dhe liderin e saj Lulzim Basha, pse i publikoi këto foto!
Pse?! Kjo pyetje i bëhet gjithë shpurës mediatike që mbron diktatorin sepse mosrrespektin për të vdekurin Edi Rama ka kohë që e ka konfirmuar, dhe kjo nuk është ndonjë risi.
Jo kur lindi, as kur ishte pedagog i arteve, as kur u kthye nga Parisi me thonj të paprerë, por kur iu dha vota qytetare për të tretën herë si kryetar i Bashkisë Tiranë, dhe ai varrezat e Tufinës i shndërroi në makth.
Rrugicat në varreza nuk i zhdukën varrmihësit por Edi Rama, jo për t’iu siguruar banesën e fundit ku do të prehen në paqe, por që mos ti shoh më mbi tokë.
E shqiptari i shkretë, futet në istikamin politik për të zhvilluar debatin për një provim të cilin diktatori e dha që në vitin 2010; E të gjithë ata familjar që shkojnë dhe përkujtojnë të afërmit e tyre, dhe nuk kanë nevojë as për morg, as për debat, janë dëshmitarë të vuajtjes së ecjeve pranë ose mbi varret që Edi Rama i sajoi nëpër rrugica, në emër të tenderit, parcelës dhe votimit në Këshillin Bashkiak! Dhe, sot, situatën në morg dhe pamjet makabre i arsyeton në emër të pandemisë!
Jo, jo, pa shkuar te morgu fare, urgjenca kurrë nuk ka funksionuar normalisht në këtë vend, me ose pa pandemi, pak rëndësi ka. Urgjenca në QSUT është vetë morgu dhe të gjithë ata që e kanë shijuar urgjencën edhe para pandemisë, e dinë që privilegji më i madh është të përfundosh në një shtrat deri sa të përfundojnë analizat. Ndryshe, je po si ata të morgut, vetëm i pambuluar me çarçaf, të tjerat janë “shendetësia që duam” me protokolle shoqëruese!
Ndonëse vitet kaluan dhe erdhi në fron “shpëtimtari”, ata që nuk përfundojnë në morg për tu tërhequr zvarr nga mjeko-ligjorët, tërhiqen zvarrë nga diktatori i cili po e shijon këtë qeverisje në parajsën e të përgjumurve ku vetëm hyzmeqarët filozofë nuk po i mungojnë; Dhe, për këtë Edi Rama nuk mund të fajësohet.
Ashtu si nuk mund të fajësohet për tjetërsimin e varrezave në Tufinë deri në ekstrem, pasi edhe në gjendje “paqeje” nuk reagoi njeri, por e justifikoi diktatorin me faktin se “nuk ka më vend”!
Dhe, çuditërisht, kaluan edhe 10 vjet dhe “vend ka”! Jo se u shpikë tokë ose planet tjetër por sepse reaguan disa media që arritën të shpëtojnë dhe bastardimin e disa rrugicave në varreza, pa e ngrënë gjithë turpin me bukë ndërsa menaxherët e varrmihësve vazhduan të fajësojnë pronarët e tokave përreth varrezave!
“Tirani u thotë filozofëve: Unë do të kryej vepra dhe ju do të kërkoni justifikim për to,” shprehet dramaturgu i njohur çek, Karel Čapek, ashtu siç shprehen dhe filozofët e diktatorit shqiptar aktual i cili u votua edhe pas shkatërrimit të varrezave.
Fat ose jo pak rëndësi ka, por ithtari i Konicës dhe ish-shkronjësi i fjalimeve të Likes merr vesh pak edhe nga historia shqiptare. Enver Hoxha nuk qeverisi deri në vdekje sepse ishte i zgjuar, madje ishte injorant i klasit të parë, por e ndihmoi po ky elektorat dhe trashëgimtarët e tyre që vazhdojnë dhe e votojnë pasardhësin e diktatorit komunist, Edi Rama!
E votojnë edhe kur u thotë shëndetësia falas dhe nuk e marrin fare as me lekë! I japin votën për mirëqenie më të mirë dhe pajtohen me mirëqënie më të keqe sepse Saliu dhe Iliri e lanë vendin në gropë! Sa të mirë do ta bënte këtë vend sikur ta kishte tërë tepsinë, tha diktatori, dhe me ose pa tepsi, i la të uritur edhe ata që i besuan dhe i dhanë votën për herë të pestë!
Por çudia nuk përfundon këtu! Edhe ata që nuk i dhanë votën e shohin me neveri dhe e shoqërojnë me dënesë, pak rëndësi ka ama janë të kënaqur që nuk janë të mbështjell me çarçaf duke u tërhequr zvarrë.
Kaq ishte! Fundjava kaloi, drama me morgun u harrua ndërsa diktatori filloi me kërcënime të reja, me mbyllje të sërishme nëse rriten shifrat me të infektuar, e nëse kjo nuk mjafton me përshkallëzim të nxirjes së jetesës së të gjithë atyre që heshtin!
Pse sot Shqipëria e ka humbur epitetin e vendit të shqiponjave dhe me plotë gojën mund të quhet parajsë e diktatorëve, këtë më së miri e ka sqaruar, jo sot, por shumë kohë më parë, gjeniu dhe shkencëtari gjerman, Albert Einstein:
Bota është një vend i rrezikshëm për të jetuar, jo për shkak të njerëzve të këqij, por për shkak të njerëzve të mirë që nuk ndërmarrin asgjë!
