Shqipëria si Europa, vetëm me largimin e Edi Ramës
nga Orjola Pampuri
Pengmarrësi i Shqiptarëve, Edi Rama, vijon të thellojë krizën politike dhe ekonomike në Shqipëri.
Nga data 18 Tetor, ditë ku u finalizua vendimi përfundimtar i KE, dhe thuajse më shumë se një muaj, kur Bundestagu vendosi 9 kushte, për të hapur negociatat për Shqipërinë, Edi Rama, jo vetëm që nuk ka ndërmarrë asnjë hap të rëndësishëm për të reflektuar mbi zgjidhjen e tyre, por vijon të mbajë me ngulm kryebashkiakët me precedentë penal, duke shkelur ligjin dhe vendimin e prokurorisë që e ka emëruar vetë, duke u dalë në mbrojtje sikur të mos ketë ndodhur asgjë, duke përfaqësuar tryezën e diskutimit për reformën zgjedhore me Damian Gjiknurin, një ndër zërat e përfshirë në Dosjen 184, ku del në pah qartë përfshirja e tij në shitblerjen e votës.
Gjithashtu vihet re konsistenca permanente për miratimin e Reformës Zgjedhore, sipas kushteve të tij, duke guxuar të artikulojë, që do ta miratojë edhe në mungesë të opozitës legjitime jashtëparlamentare, duke shkelur kështu kushtet e Bundestagut.
Nga ana tjetër, vijon të ketë një administratë të korruptuar, dhe të njollosur nga nepotizmi, ku abuzohet hapur me tenderë e përfitime abuzive.
Por Edi Rama nuk ngurron të artikulojë, Samitin e Zagrebit, ku aludon se do të rifitojë shanset për të hapur Negociatat. Por a mundet të jetë më i besueshëm për Ndërkombëtarët, një kryeministër i cili nuk ndërmerr asnjë iniciativë për të nisur diskutimin për përmbushjen e qoftë, njërit prej kushteve të Bundestagut; A mundet të jetë i besueshëm një kryeministër i cili boshatis arkën e shtetit dhe nuk paguan sigurimet e punonjësve të administratës; A mundet të jetë i besueshëm për Europën një kryeministër që vijon të mbajë në qeveri e të bashkëpunojë me personazhe me precedente penale; A mundet të jetë i besueshëm një kryeministër i cili ka manipuluar dhe deformuar informacionin rreth gjendjes reale në Shqipëri, tek Ndërkombëtarët.
Sigurisht që jo!
Sigurisht që nuk mund t’i besohet më një personazhi të tillë, kundrejt të cilit bien akuza të rënda për figurën që ai përfaqëson, duke filluar nga ajo e Presidentit Macron, i cili theksoi që është e paimagjinueshme që një vendi, të dytin për nga kërkesat e azilkërkuesve t’i hapen negociatat, dhe njëkohësisht deklarata e europarlamentares, e cila theksoi, që Shqipërisë nuk iu hapen negociatat, për shkak të krizës politike dhe votimeve moniste të 30 qershorit, dhe i gjithë informacioni i ardhur ishte jo real. Pra, me pak fjalë, çdo informacioni për Shqipërinë, pika i vihej në zyrën e Ramës.
Sot vëmendja e ndërkombëtarëve, e Ambasadës Amerikane është tek realiteti i trishtë, absurd, dhe deri tragjik Shqiptar, që ka vetëm një autor: Edi Ramën!
Platforma e opozitës, alternativa e saj për reformën zgjedhore, krijimi i kushteve dhe përmbushja e standardeve për zgjedhje të lira dhe të ndershme, vendosja e ligjit dhe e drejtësisë, ndëshkimi i gjithkujt që tenton të tjetërsojë votën e qytetarëve, ulja e taksave, alternativa dhe mundësi për turizmin, bujqësinë, për sipërmarrësit e huaj dhe vendas, për një sistem arsimor gjithëpërfshirës dhe mbështetës për çdo shtresë, për reformimin e sistemit shëndetësor dhe motivimin e mjekëve dhe personelit shëndetësor, hartimi i politikave sociale në mbështetje të shtresave në nevojë, motivimi i të rinjve për të punuar e jetuar në Shqipëri, kthen shpresën tek Shqiptarët; Vendos Shqipërinë në të njëjtën linjë me kërkesat dhe standardet Europiane, duke i dhuruar edhe mundësinë e tretë, pas liberalizimit të vizave, dhe anëtarësimit në NATO, dhe hapjes se negociatave, për të nisur një kapitull të ri detyrash e detyrimesh siç i ka hije qytetarëve evropianë.
Për një Shqipëri si Europa, e vetmja mundësi është largimi i Edi Ramës, dhe sektit të tij të turpshëm që bëri “histori” tashmë dhe në Europë, duke na kthyer vite prapa.
