“Shqipëria Turistike 30”, Edi Rama: Do ndalojmë muzikën, ata që dhunojnë plazhet të mos aplikojnë!

Menaxhimin e ujit iu mori bashkive sepse dështuan dhe nuk e bëjnë dot, dhe shpiku Operatorin Kombëtar që kontrollohet nga qeveria, ndërkohë plazhet të cilat ishin nën kujdesin e qeverisë dhe përfunduan në një kaos të vërtetë, sot Kryeministri Edi Rama gjatë fjalës së tij në eventin “Shqipëria Turistike 2030” tha se shumë shpejt do të nxirret plani i ri për bregdetin, ku do të kuptojmë se cilat plazhe do t’i marrin tërësisht bashkitë.

“Uroj të ketë dëgjuar kush duhet të dëgjojë, por do t’i ripërsërisim disa herë këto në mënyrë që ata të cilët janë mësuar të dhunojnë plazhet me shezlongë ngjitur me njëri-tjetrin dhe bishta çadrash të mos marrin më mundimin të aplikojnë fare.

Shumë shpejt do të nxjerrim të gjithë planin e ri për bregdetin dhe në bashkëpunim me të gjitha bashkitë do të kuptojmë se cilat plazhe bashkitë do t’i marrin tërësisht, por dy janë të sigurta Ksamili dhe Dhërmiu,” tha Edi Rama dhe si çdo gjë që nuk dinë ta menaxhoj kur përfshihet në kaos, edhe tek rasti i muzikës në orët e vona në lokalet “beach bar” e gjeti te ndalimi, pasi sipas Kryeministrit, janë kthyer në shqetësim për pushuesit në zonat bregdetare.

“Një tjetër element që duhet parë përfundimisht është zhurma, muzika, tallavaja e beach bar-eve të vendosura jo për të shërbyer, por për të stresuar të gjithë dynjanë. Zona të tëra të banuara, ku 99% e pushuesve nuk janë prezent në ato beach bar-e, 99.9 duhet të vuaj ngritjen e muzikës në kup të qiellit.

Ne do ta ndalojmë muzikën! Nuk do të ketë më muzikë në beach bare. Do bëjmë edhe një ridimensionim të numri të beach bareve dhe mënyrës se si do lidhen me shërbimin në tërësi.

Se u habitëm fare! Hap e beach bar, dhe nga beach bari në bech bar, është si të kalosh historinë e Rock and roll me një volum konkurrues. Këtej të bërtet metalica, e nga mbrapa të gjëmon ndonjë tjetër,” tha Edi Rama dhe përderisa përballë kishte njerëz që rrojnë nga turizmi dhe heshtnin kur një injorant u mbant leksione turizmi, ai iu tregoi zgjidhjen edhe për ata që dëshirojnë të dëgjojnë muzikë në plazhe

“Muzika duhet ndaluar plotësisht jashtë orëve të plazhit, dhe në orët e plazhit duhet të jetë për ata që shkojnë te beach bari. Kush do dëgjoj muzikë deri në 5 të mëngjesit duhet ta ofroj në zona që nuk është i gjithë qyteti qe duhet të dëgjoj jehonën.”