Shqipëria zhytet në varfëri, Basha: Politika jonë fiskale, pa taksa mbi punën dhe sistem të thjeshtë!
Në këto 7 vite, qeveria Rama e ka taksuar punën dhe dijen më shumë se çdo qeveri tjetër më parë, konstaton Kryetari i Partisë Demokratike, Lulzim Basha, duk shtuar se sot vendit i duhet një ndryshim i madh dhe rrënjësor dhe projekti fiskal që ofron forca politike që ai drejton eliminon nivelet e shumta të taksave mbi punën dhe thjeshtimin e gjithë sistemit.
“Sot të gjithë e shohim se taksa progresive e Ramës ka dështuar dhe ka prodhuar vetëm kaos, pandershmëri dhe padrejtësi. Ajo është kritikuar fort edhe nga organizatat ndërkombëtare si FMN,” thekson Lulzim Basha, dhe çdo ditë që kalon shqiptarët paguajnë më shumë taksa, ndërsa Rama i përdor ato për të bërë më shumë PPP me klientët e tij.
“Si pasojë e këtij keqmenaxhimi dhe kësaj arrogance, Shqipëria zhytet në varfëri, njerëzit humbin vendet e punës dhe kriza ekonomike thellohet,” thekson lideri i opozitës në reagimin e tij përmes rrjetit social Facebook, sot kur Edi Rama e ka futur dorën thellë në xhepin e çdo qytetari.
“Ai nuk mendon për njerëzit, por vetëm për nje grusht klientësh dhe oligarkësh dhe e ka vënë shtetin dhe çdo politikë fiskale në shërbim të tyre duke i lënë qytetarët në mëshirën e fatit. Vendit i duhet një ndryshim i madh dhe rrënjësor!”
Politika jonë fiskale është pjesë e Planit Ekonomik për t’i kthyer frymëmarrjen vendit dhe ekonomisë së njerëzve, thotë Kryetari i Partisë Demokratike duke dhënë dhe detajet e këtij Plani:
“Më shumë të ardhura në xhepat e tyre dhe më pak taksa. Ne do t’i eliminojmë nivelet e shumta të taksave mbi punën, do t’i heqim pengesat që vetëm frenojnë zhvillimin dhe do të thjeshtojmë të gjithë sistemin.”
Më shumë para në duart e qytetarëve do të nxisin investimin në arsimim dhe kualifikim dhe do t’i japin frymë rritjes ekonomike, vlerëson Basha duke përsëritur se politika fiskale e PD ka në bazë taksën e sheshtë 9% për qytetarët dhe të punësuarit, taksa më e thjeshtë dhe më e ulët në të gjitha vendet e rajonit.
Mirëqenia e shtresës së mesme, e atyre që punojnë dhe prodhojnë, është jetike për rimëkëmbjen e gjithë ekonomisë shqiptare. Vetëm një qeveri serioze që kujdeset për njerëzit mendon Kryetari i Partisë Demokratike, Lulzim Basha, do ta vendosë shtetin dhe politikbërjen në funksion të rritjes së të ardhurave të gjithësecilit dhe jo të një grushti njerëzish ndërsa përfundon:
“Shqipëria e ka potencialin të ofrojë mirëqenie dhe siguri për të gjithë qytetarët e saj!”
